( संगमेश्वर/ प्रतिनिधी )
देवरूख येथील युवा चित्रकार आणि रांगोळीकार विलास रहाटे यांनी काढलेल्या रांगोळीला उच्च आणि तंत्र शिक्षणमंत्री चंद्रकांत पाटील यांची प्रशंसा मिळाली आहे. मुंबई विद्यापिठात नुकत्याच एका व्याख्यानाचे आयोजन करण्यात आले होते. शंकर भारती या संस्थेच्या संयुक्त विद्यमाने विद्यापिठाने लक्ष्मणराव इनामदार स्मृती व्याख्यानाचे आयोजन करण्यात आले होते. इनामदार हे केंद्रीय गृहमंत्री अमित शाह आणि पंतप्रधान नरेंद्र मोदी यांचे आदर्श आणि राजकीय गुरू आहेत. या व्याख्यानाला स्वत: अमित शाह उपस्थित होते.
या व्याख्यानस्थळी इनामदार यांची भव्य पोर्ट्रेट रांगोळी काढण्यात आली होती. देवरूख येथील युवा चित्रकार आणि रांगोळीकार तसेच विश्वविक्रमकार विलास रहाटे यांनी ही रांगोळी काढली होती. रहाटे हे सध्या मुंबई विद्यापिठाच्या युथ महोत्सवाच्या संघाचे प्रशिक्षक म्हणून काम पाहात आहेत. ही रांगोळी राज्याचे उच्च आणि तंत्र शिक्षणमंत्री चंद्रकांत पाटील यांनी पाहून रहाटे यांना स्वत: दूरध्वनीवरुन संपर्क साधला. त्या वेळी पाटील यांनी रहाटे यांच्या कौशल्याचे कौतुक केले आणि रांगोळीची प्रशंसा केली.
