( बंगळुरू )
विराट कोहलीने लागोपाठ दुस-या सामन्यात शतकाला गवसणी घातली आहे. हैदराबादविरोधात विराट कोहलीने शतक झळकावले होते. त्यानंतर मोक्याच्या क्षणी त्याने पुन्हा एकदा शतकी खेळी केली आहे. विराट कोहली याने पहिल्या चेंडूपासूनच वादळी फलंदाजी केली. प्रथम संयमी आणि त्यानंतर आक्रमक फलंदाजी करत शतकाला गवसणी घातली. विराट कोहलीने ६१ चेंडूत नाबाद १०१ धावांची खेळी केली. या खेळीत विराट कोहलीने १३ चौकार आणि एक षटकार लगावला. विराट कोहलीच्या शतकी खेळीच्या बळावर आरसीबीने १९७ धावांपर्यंत मजल मारली. याने १६६ च्या स्ट्राईक रेटने धावांचा पाऊस पाडला.
विराट कोहलीने गुजरात टायटन्सविरुद्ध शानदार शतक झळकावले. आयपीएल २०२३ मधील कोहलीचे हे सलग दुसरे शतक आहे. या शतकामुळे त्याने अनेक विक्रम मोडीत काढले आहेत. कोहली आयपीएलमध्ये सर्वाधिक शतके करणारा फलंदाज ठरला आहे. त्याने आतापर्यंत एकूण ७ शतके झळकावली आहेत. आयपीएलमध्ये सर्वाधिक शतक झळकावण्याचा विक्रम विराट कोहलीच्या नावावर जमा झाला आहे. विराट कोहलीने ख्रिस गेलचा विक्रम मोडीत काढला आहे. युनिवर्स बॉस ख्रिस गेलच्या नावावर सहा शतकांची नोंद आहे तर जोस बटलर पाच शतकासह तिस-या क्रमांकावर आहे. गुजरातविरोधात विराट कोहलीने शतकाला गवसणी घातली. त्याने यंदाच्या हंगामातील दुसरे शतक झळकावले तर आयपीएलच्या करिअरमधील विराट कोहलीचे सातवे शतक झळकावले.
पुरुषांच्या T20 क्रिकेटमध्ये सर्वाधिक शतके करण्याच्या बाबतीत तो संयुक्तपणे तिसऱ्या स्थानावर पोहोचला आहे. ख्रिस गेल या बाबतीत आघाडीवर आहे. गेलने २२ शतके झळकावली आहेत. कोहलीने ८ शतके झळकावली आहेत. या शतकासह विराट कोहली आयपीएलमध्ये सलग दोन शतके झळकावणाऱ्या खेळाडूंच्या यादीत सामील झाला आहे. अशी कामगिरी करणारा विराट तिसरा फलंदाज ठरला आहे.
शिखर धवनने २०२० मध्ये दिल्ली कॅपिटल्सकडून खेळताना पहिल्यांदा हा पराक्रम केला होता. यानंतर राजस्थान रॉयल्सकडून खेळताना जोस बटलरने २०२२ मध्ये सलग २ शतके झळकावली होती. आता आरसीबीचा विराट कोहली अशी कामगिरी करणारा तिसरा फलंदाज ठरला आहे. विराट कोहलीच्या या शानदार शतकामुळे आरसीबीला २० षटकात ५ गडी गमावून १९७ धावा करता आल्या. एकीकडे संघ सातत्याने विकेट गमावत होता, तर दुसरीकडे विराट कोहली खंबीरपणे उभा राहून संघासाठी धावा काढत होता. विराट कोहलीने IPL 2023 च्या १४ सामन्यांमध्ये ५३.२५ च्या सरासरीने आणि १३९.८२ च्या स्ट्राइक रेटने ६३९ धावा केल्या आहेत. यादरम्यान त्याच्या बॅटमधून ६ अर्धशतके आणि २ शतके झळकली आहेत.
आयपीएलच्या सोळाव्या हंगामात विराट कोहलीच्या बॅटने धावांचा पाऊस पाडला. विराट कोहलीने १४ सामन्यात सहाशेपेक्षा जास्त धावा चोपल्या. यामध्ये दोन शतके आणि सहा अर्धशतकाचा समावेश आहे. ४५ ची सरासरी आणि १३६ च्या स्ट्राईक रेटने विराट कोहलीने धावांचा पाऊस पाडला. विराट कोहली ऑरेंज कॅपच्या स्पर्धेत दुस-या क्रमांकावर आहे. या यादीत आरसीबीचा फाफ डु प्लेसिस पहिल्या क्रमांकावार आहे. डु प्लेसिसच्या नावावर ७०० पेक्षा जास्त धावा आहेत.
