(जाकादेवी/संतोष पवार)
रत्नागिरी तालुक्यातील ग्राम विकास मंडळ, वाटद- मिरवणे संचलित खंडाळा इंग्लिश मिडियम स्कूल येथे आषाढी एकादशी निमित्त दिंडी सोहळा मोठ्या भक्तिभावाने व उत्साहात साजरा करण्यात आला.
शालेय शिक्षण कमिटी अध्यक्ष श्री. परशुराम जोग यांनी पालखीतील विठ्ठल रखुमाईच्या प्रतिमेचे पूजन करून दिंडी सोहळ्याला सुरुवात केली. शालेय विद्यार्थी प्रमुख या पदासाठी निवडणुका घेण्यात आल्या होत्या. त्याचा निकाल यावेळी जाहीर करण्यात आला. शाळेतील इयत्ता दहावीतील विद्यार्थिनी कु. वैष्णवी पेडणेकर ही विद्यार्थी प्रमुख म्हणून निवडून आली. तिला सर्व शिक्षक व विद्यार्थी यांनी शुभेच्छा देऊन अभिनंदन केले. त्यानंतर सर्व विद्यार्थ्यानी मोठ्या श्रद्धेने शाळेत हरीनाम जयघोष करत रिंगण घातले. त्यानंतर सर्व विद्यार्थी, शिक्षक व पालक यांनी कांबळे लावगण रोड ते खंडाळेश्वर मंदिर हरीनाम गजरात पायी वारी काढली.
हरीनाम गजराने अखंड परिसर दुमदुमून गेला होता. विद्यार्थी प्रमुख कु. वैष्णवी पेडणेकर हिच्या हस्ते देव खंडाळेश्वराची पूजा व आरती करण्यात आली. मुलांना केळी व लाडू प्रसाद वाटप करून दिंडीची सांगता करण्यात आली. दिंडीत शाळेचे सीईओ, मुख्याध्यापक व सर्व शिक्षक व कर्मचारी उपस्थित होते.
