(जाकादेवी / संतोष पवार)
रत्नागिरी तालुक्यातील वरवडे शिक्षण पंचक्रोशी वरवडे या शिक्षण संस्थेच्या वाटद खंडाळा माध्यमिक विद्यालयातील जेष्ठ कलाध्यापक श्रीनिवास जगन्नाथ माने यांचे दि.१५ रोजी सायंकाळच्या सुमारास हृदयविकाराच्या तीव्र झटक्याने गडनरळ येथील त्यांच्या आंबा बागेत दुःखद निधन झाले. मृत्यू समयी त्यांचे वय ५६ वर्ष होते.
चित्रकला विषयात ते पारंगत होते. चित्रकला क्षेत्रामध्ये त्यांनी अनेक विद्यार्थी घडवले. स्वतःच्या पायावर उभे केले. ते अत्यंत प्रेमळ ,मनमिळावू आणि परोपकारी व्यक्तिमत्त्व होते.कलाध्यापक म्हणून त्यांनी अतिशय उठावदार कामगिरी केली. परिसरातील गणेश मूर्तीकारांना ते गणेश मूर्ती रंगवून देत असत.सामाजिक बांधिलकी जपत त्यांनी कला जोपासली.
शासकीय रेखाकला परीक्षेत तसेच प्रासंगिक विविध प्रकारच्या विषयांवरील स्पर्धांमध्येत्यांनी आपल्या शाळेचे नाव चमकविले होते. कला क्षेत्रात त्यांनी आपली आगळी वेगळी ओळख निर्माण केली होती. या शिक्षण संस्थेत कै. माने सर यांनी ३२वर्ष सेवा केली. त्यांचे मूळ गाव सातारा जिल्ह्यातील कराड तालुक्यातील विंग होय.त्यांच्या पश्चात पत्नी मुलगा, मुलगी असा परिवार आहे. दिवंगत श्रीनिवास जगन्नाथ माने यांच्यावर अंत्यसंस्कार त्यांच्या मूळ गावी विंग येथे करण्यात येणार आहेत.
