(जाकादेवी / वार्ताहर)
रत्नागिरी तालुक्यातील वरवडे पंचक्रोशी शिक्षण प्रसारक मंडळ वरवडे संचलित माध्यमिक विद्यालय वरवडे भागशाळा वाटद – खंडाळा व श्रीमती पार्वती शंकर बापट कनिष्ठ महाविद्यालय वाटद – खंडाळा येथील मुलींच्या क्रिकेट संघाने रत्नागिरी येथील गोगटे महाविद्यालयाच्या मैदानावर घेण्यात आलेल्या १९ वर्षाखालील मुलींच्या जिल्हास्तरीय क्रिकेट स्पर्धेत डी.बी.जे.काॅलेज चिपळूण संघाचा ९ गडी राखून पराभव केला.
डी.बी.जे. कॉलेज चिपळूण संघाने नाणेफेक जिंकून प्रथम फलंदाजी करण्याचा निर्णय घेतला. या संघाने प्रथम फलंदाजी करताना निर्धारित ५ षटकात ६ गडी बाद २९ धावा केल्या. वाटद खंडाळा संघातील गोलंदाज शिवानी गोरे व मनाली निंबरे यांनी प्रत्येकी दोन खेळाडू बाद केले तर सलोनी धातकर हिने एक खेळाडू बाद केला. वाटद खंडाळा संघाने आपल्या समोरील लक्ष्य ३ षटकात केवळ एक खेळाडू गमावून पूर्ण केले. या संघातील फलंदाज शिवानी गोरे हिने नाबाद १२ धावा, वेदिका लोकरे नाबाद ६ धावा, सलोनी धातकर हिने ५ धावा केल्या.
या विजयाने वाटद खंडाळा संघाची विभागस्तरीय स्पर्धेसाठी निवड झाली. संघातील खेळाडूंना प्रशिक्षक म्हणून शाळेतील क्रीडा शिक्षिका सौ.नम्रता सावंत आणि श्रीमती पल्लवी बोरकर यांनी बहुमोल मार्गदर्शन केले. या संघातील सर्व खेळाडूंचे व त्यांना मार्गदर्शन करणाऱ्या शिक्षकांचे संस्थेचे अध्यक्ष, सर्व संस्थाचालक, प्रशालेचे मुख्याध्यापक, पर्यवेक्षक, शिक्षक, शिक्षकेत्तर कर्मचारी व विद्यार्थी यांनी अभिनंदन केले.
