( लांजा )
लांजा कोर्ले रोडवरील विवली येथे दुचाकीने रिक्षाला दिलेल्या धडकेत 5 जण जखमी झाल्याची घटना रविवार 13 नोव्हेंबर रोजी घडली.
पोलिसांनी दिलेल्या माहितीनुसार, लांजा कोर्ले रस्त्यावरील विवली येथे राजन गणपत शितप ( वय ४३, राहणार करबुडे रत्नागिरी ) हे त्यांच्या ताब्यातील रिक्षातून भाडे घेऊन लांजा विवली बौद्धवाडी असे जात होते. रविवार 13 नोव्हेंबर रोजी दुपारी २.३० वाजण्याच्या दरम्याने विवली बौद्धवाडीकडे जाणाऱ्या रस्त्याकडे वळत असताना पाठीमागून आलेल्या दुचाकीस्वारांना रिक्षाला पाठीमागून जोरदार धडक दिली. या धडकेत दुचाकीस्वार अमोल अनंत पांचाळ ( वय २३, राहणार खेरवसे ) आणि संतोष केशव लोटणकर ( वय ४७ ,राहणार खेरवसे ) हे जखमी झाले. रिक्षा चालक शितप हे देखील जखमी झाले. याबरोबरच रिक्षात बसलेले श्रावणी सुनील कांबळे ( ३६ , राहणार विवली बौद्धवाडी ) तसेच त्यांची मुलगी प्रांजल सुनील कांबळे ( वय ८ ) असे एकूण पाच जण जखमी झाले.
या अपघातानंतर सर्व जखमींना तातडीने लांजा ग्रामीण रुग्णालयात दाखल करण्यात आले. तर गंभीर रुग्णांपैकी रिक्षा चालक शितप तसेच मोटरसायकलस्वार संतोष लोटणकर यांना रत्नागिरी जिल्हा शासकीय रुग्णालयात दाखल करण्यात आले आहे.
