( हिंगोली )
जिल्ह्याच्या कळमनुरी मार्गावरील माळेगावजवळ चारचाकी गाडीचा अपघात झाला. या गाडीत एक पोलीस उपनिरीक्षक व त्यांचे दोन सहकारी मित्र प्रवास करत होते. या दुर्घटनेत पोलीस उपनिरीक्षकाचा जागीच मृत्यू झाला. तर इतर दोन जण जखमी झाले असून त्यांच्यावर रुग्णालयात उपचार सुरू आहेत. शनिवारी रात्री १० वाजताच्या सुमारास ही घटना घडली. निळकंठ दंडगे असे मृत पोलीस उपनिरीक्षकाचे नाव आहे.
या अपघाताची माहिती मिळताच कळमनुरी पोलिसांनी घटनास्थळी धाव घेतली. पोलिसांनी जखमींना तातडीने उपजिल्हा रुग्णालयात दाखल केले. परंतु डॉक्टरांनी निळकंठ दंडगे यांना तपासून मृत घोषित केले. तर दंडगे यांच्या दोन सहकारी मित्रांना प्राथमिक उपचार करून अधिक उपचारासाठी नांदेडकडे रवाना केले. दरम्यान, निळकंठ दंडगे हे नागपूर शहर येथे पोलीस उपनिरीक्षक या पदावर कार्यरत होते. दोन वर्षांपूर्वीच खात्यांतर्गत परीक्षा देऊन ते पोलीस उपनिरीक्षक झाले होते. ते हिंगोली जिल्ह्यातील औंढा नागनाथ तालुक्यातील जामगव्हाण गावचे रहिवासी होते.
