तेजा मुळ्ये, रत्नागिरी
माझी मुलगी म्हणाली आपण आज जरा सोनारांकडे जाऊया , मला रातराणी कानातले बघायचे आहेत. माझ्या मनाचे कान अचंबीत झाले. रातराणी शब्द ऐकल्यावर डोळ्यासमोर येणारे चांदणी सारख्या फिकटपोपटी रंगांच्या फुलांचे झुबके आणि मनधुंद करणारा संध्याकाळी आसमंत भारून टाकणारा सुगंध!
काही क्षण मी धुंदीत राहिले. वेडच मन असतं आपलं. बारीकसारीक संदर्भांनी क्षणात लहानणपणात डोकावून येत. आम्ही दोघी नेहमीच्या सोनारांकडे गेलो त्यांनी डबीत लावलेले चांदीचे कानातले दाखवले. खूप छान कलाकुसर असलेले कलात्मक रातराणीच्या फुलासारखे कर्णालंकार पाहून कौतुक वाटलं. काय सुचतं कलाकार मंडळींना आणि कलाकुसर करणाऱ्या कारागिरांना! दुकानदाराने सांगितलेल्या अनुभव कथनाने लक्षात आलं, खऱ्या रातराणीच्या सुवासाने वेड लावणाऱ्या या रातराणी अलंकाराने देखील लोकांना वेडं केलं आहे.
आता वेलीवर झाडांवर फुलणारी अजूनही काही फुलं अशीच अलंकार सदृश्य आपल्या भेटीला येतील कदाचित !
