(नवी दिल्ली)
जम्मू- काश्मीरच्या राजौरी जिल्ह्यात शुक्रवार सकाळपासून सुरक्षा दल आणि दहशतवाद्यांमध्ये सुरू असलेल्या चकमकीत दहशतवाद्यांनी भारतीय लष्कराच्या वाहनावर केलेल्या ग्रेनेड हल्ल्यात ५ जवान शहीद झाले आहेत. २० एप्रिल रोजी पुंछमध्ये लष्कराच्या ट्रकवर झालेल्या हल्ल्यात ५ जवान शहीद झाले होते. या हल्ल्यातील दहशतवाद्यांचा शोध घेण्याकरिता ३ मेपासून अभियान राबवण्यात येत आहे.
राजौरी जिल्ह्यातील कांडी भागातील केसरी हिल येथे दहशतवाद्यांचा गट लपला असल्याची माहिती जवानांना मिळाली होती. त्यानुसार, त्यांनी येथे सर्च ऑपरेशन सुरू केले. या सर्च ऑपरेशनदरम्यान शुक्रवारी सकाळी साडेसात वाजता दहशतवाद्यांकडून गोळीबाराला सुरुवात झाली. त्याला प्रत्युत्तर म्हणून जवानांनीही गोळीबार सुरू केला. यावेळी दहशतवाद्यांनी लष्कराच्या वाहनावर ग्रेनेड हल्ला केला.
या हल्ल्यात २ जवान जागीच शहीद झाले, तर ४ जण जखमी झाले. जखमींना तातडीने हेलिकॉप्टरने रुग्णालयात दाखल करण्यात आले, परंतु ४ जखमींपैकी तिघांचा उपचारांदरम्यान मृत्यू झाला आहे. त्यामुळे एकूण मृतांचा आकडा ५ झाला आहे. या चकमकीत शहीद झालेल्या जवानांची संख्या वाढू शकते, असे लष्कराने म्हटले आहे. या चकमकीत काही दहशतवादीही ठार झाल्याची शक्यता आहे.
