(राजापूर / प्रतिनिधी )
येरडव ते कारवली असा दूचाकीवरुन प्रवास करताना पाठीमागे बसलेल्या महिलेचा तोल जावून पडल्याने प्रौढ महिलेचा मृत्यू झाल्याची घटना 24 जुलै रोजी दुपारी 12.30 वा. च्या सुमारास घडलीे होती. जयश्री मंगेश विश्वासराव (50, कारवली, राजापूर) असे मृत्यू झालेल्या महिलेचे नाव आहे. याबाबची फिर्याद मंगेश दशरथ विश्वासराव (59, कारवली, राजापूर) यांनी राजापूर पोलीस स्थानकात दिली. त्यानुसार दुचाकीस्वार मुकेशकुमार ईश्वर देव (34, सध्या पाचल, मूळ उत्तरप्रदेश) याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, मुकेशकुमार हा आपल्या ताब्यातील दुचाकीवरुन जयश्री यांना येरडव ते कारवली असा जात होता. कारवली रोडच्या तिठयावर आला असता रस्त्यावरील कॅनॉलचे पुलावरील उंचवटे चुकवत असताना पाठीमागे बसलेल्या जयश्री यांचा तोल जावून त्या खाली पडल्या. यात त्यांना गंभीर दुखापत झाली आणि त्यातच त्यांचा मृत्यू झाला.
मंगेश विश्वासराव यांनी दिलेल्या फिर्यादीनुसार मुकेश देव याच्यावर बेरदकारपणे गाडी चालवून मृत्यूस कारणीभूत ठरल्याप्रकरणी भादविकलम 304 (अ), 279, 338 मोटर वाहन कायदा कलम 184 नुसार गुन्हा दाखल करण्यात आला आहे.
