(रत्नागिरी/प्रतिनिधी)
टिव्ही वरचे चित्र दिसत नाही म्हणून डिशची केबल चेक करण्यासाठी घराच्या पत्र्यावर चढलेल्या तरुणाचा पत्र्यासह खाली कोसळून मृत्यू झाल्याची घटना मुरुगवाडा येथे घडली. ही घटना सोमवार 27 जून रोजी सायंकाळी 6 वाजण्याच्या सुमारास घडली. मयूर विश्वास शिरधनकर (32, रा़ मुरूगवाडा रत्नागिरी) असे मृत्यू झालेल्या तरुणाचे नाव आहे.
पोलिसांनी दिलेल्या माहितीनुसार मयुर हा सोमवारी सायंकाळी 6 वाजण्याच्या सुमारास आपल्या घरी टिव्ही पाहात होता. यावेळी टिव्ही वरचे चित्र त्याला व्यवस्थित दिसत नव्हते. म्हणून तो डिशची केबल चेक तपासण्यासाठी घरावर चढला. यावेळी पत्र्यावरून मयूर याचा पाय घसरला. त्यावेळी त्याने स्वतःला सावरण्याचा प्रयत्न केला. मात्र घरावरील सिमेंटचा पत्रा तुटून मयुर खाली कोसळला. तुटलेले पत्रे त्याच्या अंगावर पडल्याने त्याच्या डोक्याला गंभीर दुखापत झाली.
मयुर याला उपचारासाठी तात्काळ रत्नागिरी जिल्हा शासकीय रूग्णालयात दाखल करण्यात आले. यावेळी पुढील उपचारासाठी त्याला रत्नागिरीतील एका खासगी रूग्णालयात दाखल करण्यात आले होते. मंगळवारी सकाळी मयुर याचा उपचारादरम्यान मृत्यू झाला. या घटनेची नोंद रत्नागिरी शहर पोलिसांत करण्यात आली आहे.
