रत्नागिरी : लायन्स हॉस्पिटलच्या पुढे चढावामध्ये काल रात्री 11.30 वाजण्याच्या सुमारास 3 कुत्र्यांनी रस्ता ओलांडणार्‍या कोल्ह्याचा थरारक पाठलाग करुन पकडले. मात्र कुत्र्यांच्या तावडीतून कशीबशी सुटका करत कोल्ह्याने आपला जीव वाचवला.
नवनिर्माणकडे जाणार्‍या रोडवर लायन्स हॉस्पिटलच्या समोरील चढावात जंगलातून बाहेर एक कोल्हा दुचाकीच्या समोरुन भरधाव रस्ता ओलांडत होता. दुचाकीच्या प्रकाशात स्पष्टपणे दिसल्यामुळे 10-12 फुटावर असलेल्या 3 कुत्र्यांनी त्या दिशेने धाव घेतली. तोपर्यंत कोल्ह्याने रस्ता ओलांडला होता. एका कुत्र्याने रस्त्यावरून उंच उडी घेत कोल्ह्यावर झडप घातली. मात्र शेपटी तोंडात सापडल्याने कोल्ह्याने कशीबशी सुटका करत कंपाउंड होलमधून पलिकडे प्रवेश केला. तेवढयात दोन कुत्र्यांनी पुढे येऊन त्याला अडवण्याचा प्रयत्न केला. मात्र त्या दोघांनाही चकवा देत खालच्या बाजूला असलेल्या जंगलच्या दिशेने तो पळाला. तिकडेही कुत्र्यांनी त्याचा पाठलाग केला. मात्र जंगल व रात्रीच्या अंधारात कुत्र्यांना तो दिसून आला नाही. सावज हातातून निसटल्याने हताश होवून कुत्रे माघारी परतले. पाच मिनिटांत रंगलेल्या या थरारक पाठलागात कोल्ह्याने सुटकेचा निःश्वास टाकला असेल.
