कानपूरच्या बिल्हौरमध्ये एक मोठी दुर्घटना घडली आहे. अरौल येथील कोठी घाटावर गंगेत आंघोळ करताना सहा जणांचा बुडून मृत्यू झाला असून त्यामध्ये एक तरुण आणि पाच अल्पवयीन मुली गंगेत बुडाल्या आहेत.
पोलिसांनी येथे बचावकार्य सुरू केले असून गंगा नदीत त्यांचा शोध सुरू आहे. घाटावर मोठ्या संख्येने लोक जमू लागले आहेत. पोलिस आणि प्रशासनाचे अधिकारीही घटनास्थळी पोहोचले आहेत. शिवाय, आरोग्य विभागाच्या सहा रुग्णवाहिका घटनास्थळी दाखल झाल्या आहेत. कानपूर नगरच्या पश्चिमेला सुमारे ५० किमी अंतरावर असलेल्या अरौल शहरातील बरांडा गावात राहणा-या संदीप कटियार यांनी मकानपूर रोडवर कपड्यांचे नवे दुकान सुरु केले आहे. रविवारी या दुकानाचे उद्घाटन झाले. या उद्घाटनाला कटियार यांचे कानपूर आणि फारुखाबाद येथून नातेवाईक आले होते.
यावेळी नातेवाईकांसह मुले गंगा नदीत आंघोळीसाठी गेली असता ही दुर्घटना घडली. यामध्ये अनुष्का उर्फ दिव्या कुमार, बहीण अंशिका, मुलगा राम सिंह, फारुखाबादमधील रामबाबू, तनुष्का, अनुष्का, सृष्टी आणि गौरी यांच्यासह आठ ते दहा जण आंघोळीसाठी कोठी घाटावर गेले होते. यावेळी यातील सहा जणांचा बुडून मृत्यू झाला. पोलिसांनी स्थानिकांच्या मदतीने बुडालेल्यांचा शोध सुरू केला आहे.
