(रत्नागिरी)
शहरातील मिरकरवाडा बंदर येथे मासेमारी बोटीवरील तांडेलाचा बोटीवर पडून मृत्यू झाला. ही घटना १० ऑगस्ट रोजी दुपारी १ वा. सुमारास घडली. राजदीप दशरथ पावसकर (३६, रा. पावस, रत्नागिरी) असे मृत्यू झालेल्या तांडेलाचे नाव आहे.
बुधवारी दुपारी १ वा. सुमारास राजदीप मिरकरवाडा येथील बोटीवरील ढोल उघडताना तो बोटीवरच पडून बेशुध्द झाला. बोटीवरील इतर सहकाऱ्यांनी त्याला तातडीने जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी राजदीपला तपासून मृत घोषित केले. याप्रकरणी शहर पोलिस ठाण्यात आकस्मिक मृत्यूची नोंद करण्यात आली आहे.
