(जाकादेवी / वार्ताहर)
रत्नागिरी तालुक्यातील बळीराम परकर विद्यालय व मुरारी तथा भाई मयेकर ज्युनिअर कॉलेज येथील सहाय्यक शिक्षिका सौ. नेहा बिपीन परकर यांनी आपल्या पन्नासाव्या वाढदिवसानिमित्त जाकादेवी प्रशाला व कनिष्ठ महाविद्यालयाला सुमारे पन्नास हजार रुपये किमतीचा वॉटर कुलर देणगी रूपाने दिला आहे.
मालगुंड एज्युकेशन सोसायटीच्या वतीने बळीराम परकर विद्यालय व भाई मयेकर ज्युनिअर कॉलेज येथील उपक्रमशील कलाध्यापक श्री.शाम गजानन पवार आणि उपक्रमशील शिक्षिका सौ. नेहा बिपीन परकर यांचा पन्नासावा वाढदिवस मालगुंड प्रशालेच्या कै.सदानंद परकर सभागृहात आयोजित केला होता.या वाढदिवसाचे साधून विद्यालयातील ज्येष्ठ शिक्षिका सौ. नेहा बिपीन परकर यांनी जाकादेवी येथील तात्यासाहेब मुळ्ये माध्यमिक विद्यालय व बाबाराम पर्शराम कदम कनिष्ठ महाविद्यालयाची गरज लक्षात घेऊन सुमारे ५० हजार रुपये किमतीचा उच्च प्रतिचा वॉटर कुलर देणगी रूपाने दिला. शिवाय आपल्या वाढदिवसानिमित्त जाकादेवी प्रशाला व कनिष्ठ महाविद्यालयातील सर्व विद्यार्थ्यांना खाऊचे वाटपही केले.
श्री.सौ.परकर कुटुंबीय यांनी दिलेल्या या स्तुत्य देणगी बद्दल मालगुंड एज्युकेशन सोसायटीचे चेअरमन सुनिल उर्फ बंधू मयेकर, उपाध्यक्ष विवेक परकर, कोषाध्यक्ष संदीप कदम,सचिव विनायक राऊत, जाकादेवी विद्यालयाचे सी.ई.ओ. व संस्थेचे संचालक श्री.किशोर पाटील,जाकादेवी प्रशालेचे मुख्याध्यापक श्री.नामदेव वाघमारे यांनी परकर कुटुंबियांना मनापासून धन्यवाद दिले.पन्नासाव्या वाढदिवसानिमित्त शिक्षण संस्था व शिक्षण संस्थेच्या विविध शाखांच्यावतीने बळीराम परकर विद्यालयातील दोन्ही शिक्षकांना शुभेच्छा देण्यात आल्या.
