(नागपूर)
मनसे अध्यक्ष राज ठाकरे आणि केंद्रीय मंत्री नितीन गडकरी नागपुरात एका कार्यक्रमाच्या निमित्ताने एकत्र आले. यावेळी दोन्ही नेत्यांनी एकमेकांचं तोंडभरून कौतुक केलं. केंद्रीय मंत्री नितीन गडकरी हे जे काही करतात ते वरुनच करतात, माझे आणि नितीन गडकरींचे विचार जुळतात कारण आमचे विचार भव्य-दिव्य आहेत, असे मनसे अध्यक्ष राज ठाकरे यांनी म्हटले आहे. ते विदर्भाच्या दौ-यावर असून त्यांनी काल नागपूर येथील फुटाळा लेकवरच्या लेझर शोच्या कार्यक्रमाला उपस्थिती लावली. यावेळी त्यांनी नितीन गडकरी यांच्या कामांचे तोंड भरून कौतुक केले.
फुटाळा लेकवरचा लेझर शो पाहिल्यानंतर असे आजवर मी भारतात पाहिलेले नाही, असे जे काही पाहिले ते भारताच्या बाहेर पाहिले असे कौतुक राज ठाकरे यांनी केले. नितीन गडकरी खाली काहीच करत नाहीत. उड्डाणपूलही वर जातो, कारंजेही वर जातात. आमचे दोघांचे विचार मिळण्याचे कारण म्हणजे आम्ही जे काही करतो, ते भव्यदिव्य करतो. मी जे काही आज पाहिले ते अद्भूत आहे. हे फक्त नागपूरच्या लोकांसाठी नाही तर देशातील लोकांसाठी पाहण्यासारखी गोष्ट आहे, असे कौतुक राज ठाकरे यांनी यावेळी केले.
