लग्न कार्यक्रम असेल तर घोडा असलाच पाहिजे. वराला घोड्यावर बसवलं जातं आणि नवरदेवाची वरात काढली जाते. अशाच एका लग्नात घोड्याचा व्हिडिओ सोशल मीडियावर व्हायरल झाला आहे. डीजेचा आवाज ऐकून घोडा चवताळला. त्याने वऱ्हाड्यांना पायाखाली तुडवले आहे. ही हृदयद्रावक घटना कॅमेऱ्यात कैद झाली आहे. ज्याचा व्हिडिओ व्हायरल होऊ लागला आहे.
वर निघण्याच्या तयारीत होता. घोडा देखील वरातीसाठी सजला होता. वऱ्हाड्यांनी डीजेवर ताल धरला. डीजेचा आवाज मोठा झाला आणि तो आवाज घोड्याच्या कानात घुसला तसा तो बेभान झाला. त्याने पुढचे दोन्ही पाय वर केले आणि मागच्या दोन पायांवर उड्या मारू लागला. त्याने आपल्यासमोर येणाऱ्या प्रत्येकाला पायाखाली चिरडलं.
माहितीनुसार ही घटना उत्तर प्रदेशच्या हमीरपूर जिल्ह्यातील आहे. या घटनेत बरेच लोक जखमी झाल्याचं सांगितलं जातं आहे. त्यांना रुग्णालयात दाखल करण्यात आलं. तर घोड्याला दूर नेऊन नंतर लग्नसोहळा उरकण्यात आला.
