संगमेश्वर/ प्रतिनिधी
संगमेश्वर येथील व्यापारी पैसा फंड संस्थेच्या कला विभागाने उभारलेल्या पैसा फंड कलादालनाला मुंबई येथील आर्ट व्हिजन ग्रूप तर्फे नुकतेच राजा रवि वर्मा पुरस्कार देवून गौरवण्यात आले आहे . कलादालनाला पुरस्कार देवून गौरवल्याबद्दल व्यापारी पैसा फंड संस्था आणि पैसा फंड इंग्लिश स्कूलचे सर्व स्तरातून अभिनंदन करण्यात येत आहे .
कोविड काळात शाळा बंद असताना जी. डी . आर्ट झालेले प्रशालेतील माजी हेमंत यशवंत सावंत , प्राची जनार्दन रहाटे आणि सोनवडे येथील स्नेहांकित शेखर पांचाळ या युवा कलाकारांनी अथक प्रयत्न करुन नामवंत चित्रकारांच्या सुमारे ७० चित्राकृती आणि शिल्पकारांच्या १० शिल्पाकृती जमवून भव्य आणि नेत्रदीपक असे कलादालन उभे केले . याच बरोबर प्रवेशद्वाराजवळ फायबर मध्ये एक ९ फूट उंचीची भव्य पेंसील आणि थ्री डी पेंटींग देखील तयार केले . मुंबई गोवा महामार्गाचे सध्या चौपदरीकरण सुरु असल्याने या मार्गावरुन जाणाऱ्या पर्यटकांना कोकणच्या ग्रामीण भागातील कलाकारांची कला पहाता यावी तसेच या कलाकारांच्या कलेला एक व्यावसायिक व्यासपीठ मिळावे हा व्यापारी पैसा फंड संस्थेचा या मागे मुख्य उद्देश होता . कलाशिक्षण घेतलेल्या पैसा फंडच्या माजी विद्यार्थ्यांनी आणि असंख्य देणगीरांनी केलेल्या सहकार्यामुळे लॉकडाऊनच्या काळात हे भव्य कलादालन आकारास आले .
मुंबई , पुणे सह ठिकठिकाणचे पर्यटक , कलाक्षेत्रातील मान्यवर , लोकप्रतिनिधी तसेच उच्च शासकीय अधिकारी यांनी पैसा फंडच्या कलादालनाला भेट देवून या आगळ्यावेगळ्या उपक्रमाचे वेळोवेळी कौतूक केले आहे . रत्नागिरी तालुक्यातील तरवळ येथील एक हरहुन्नरी कलाकार अर्जुन माचिवले हे मुंबई मध्ये एक प्रथीतयश कलाकार म्हणून काम करत आहेत . त्यांनी मुंबईत आर्ट व्हिजन या नावाने ग्रूप स्थापन केला असून या मार्फत विविध कलाविषयक चळवळी सुरु असतात . चित्रकार अर्जुन माचिवले यांनी पैसा फंड कलादालनाला स्वतः भेट देवून या उपक्रमाची सर्व माहिती प्रशालेच्या कलाविभागाकडून घेतली होती . चित्रकार अर्जुन माचिवले यांच्या आर्ट व्हिजन ग्रूप तर्फे नुकताच राज्यातील कलाकार आणि सामाजिक कार्य करणाऱ्या व्यक्तिना ” राजा रवि वर्मा ” राज्यस्तरीय पुरस्कार देवून गौरविण्यात आले . यामध्ये संगमेश्वर येथील पैसा फंड कलादालनालाही स्मृतिचिन्ह देवून खास गौरविण्यात आले आहे . प्रभादेवी , मुंबई येथे संपन्न झालेल्या कला प्रदर्शन आणि पुरस्कार प्रदान सोहळ्याला उच्च आणि तंत्रशिक्षण मंत्री उदय सामंत आणि मान्यवर उपस्थित होते .
व्यापारी पैसा फंड संस्थेच्या पैसा फंड कलादालनाला ” राजा रवि वर्मा ” पुरस्कार प्राप्त झाल्याबद्दल प्रशालेसह कला विभागाचे संस्था अध्यक्ष अनिल शेट्ये , उपाध्यक्ष किशोर पाथरे , सचिव धनंजय शेट्ये , सदस्य संदीप सुर्वे , रमेश झगडे यांच्या सह आमदार शेखर निकम , आमदार राजन साळवी , ज्येष्ठ चित्रकार शिल्पकार प्रकाश राजेशिर्के , चित्रकार चंद्रकला कदम , चित्रकार मुक्ता बालीगा , चित्रकार सुर्यकांत होळकर , चित्रकार एस . निबाळकर , चित्रकार अनिल अभंगे , सह्याद्री कला महाविद्यालयाचे प्राचार्य माणिक यादव , चित्रकार विष्णू परीट आदींनी अभिनंदन केले आहे .
