पाचल येथे दुचाकी व ट्रकच्या अपघातात महिलेचा जागीच मृत्यू

(पाचल / वार्ताहर)

आज दुपारी तीन वाजण्याच्या सुमारास राजापूरहून पाचलला येणारा दुचाकीस्वार गणेश धोंडू गुरव (वय वर्ष 38) रा. काजिर्डा व तळवडे गावच्या महिला मीनाक्षी मनोज कलमष्टे (वय वर्ष 30) यांचा पाचलवरून ओणीच्या दिशेने जाणाऱ्या ट्रकला जोरदार टक्कर दिल्याने अपघात झाला. सदर अपघातात ट्रकच्या मागच्या चाकाला जोरदार धडक लागल्याने दुचाकीवर मागच्या सीटवर बसलेल्या महिलेला जोरदार धडक लागली व सदर महिलेचा रस्त्यावर पडून जागीच मृत्यू झाला.

दुचाकी स्वार गणेश गुरव याने हेल्मेट घातल्याने तो या अपघातात वाचू शकला, असं घटना पाहिलेल्यांचे म्हणणं आहे. अपघात घटनेची तीव्रता पाहता सदर महिलेने जर हेल्मेट घातले असते तर त्याही महिलेचा जीव वाचू शकला असता अशी चर्चा घटनास्थळी ग्रामस्थांमध्ये चालू होती. सदर घटना येळवण बागवेवाडी या ठिकाणी दुपारी तीन वाजण्याच्या सुमारास घडली असून या ठिकाणी याआधी देखील अनेक अपघात घडले आहेत. सदर घटनेचा दुचाकीस्वार गणेश गुरव याला देखील गांभीर दुखापत झाली असून त्याला रायपाटण रुग्णालयातून रत्नागिरी येथील सिव्हिल रुग्णालयात रेफर करण्यात आले आहे.

आपण राजापूरहून पाचल च्या दिशेने जातं असताना ओणी येथील येरडवं फाटा येथे सदर महिलेने हात दाखवून मला थांबवून पाचल ला नेण्याची विनंती केली, असं गणेश गुरुव यांचं म्हणणं आहे. सदर घटनेचा पुढील तपास रायपाटण दूरक्षेत्र पोलीस स्टेशनचे तपासीक कमलाकर पाटील सह पो.कॉ. निलेश कात्रे व पो. कॉ. भिम कोळी पाहत आहेत.