( संगलट / वार्ताहर )
आपल्या दीड वर्षांच्या मुलासमोर आईने आत्महत्या केल्याची दुर्दैवी घटना आज गुरुवारी चिपळूणमधील पाग परिसरात घडली. कोमल सचिन दिलवाले (२६) असे मृत महिलेचे नाव आहे. आत्महत्येचे कारण समजू शकले नाही.
मिळालेल्या माहितीनुसार, पाग येथील एका अपार्टमेंटमध्ये कोमल नवरा, दीड वर्षांचा मुलगा, सासू-सासरे यांच्या समवेत रहात होती. गुरुवारी सकाळी ती आणि मुलगा हे दोघेच घरी होते. तर इतर कामानिमित्त बाहेर गेले होते. दुपारी बारा वाजण्याच्या सुमारास कोमलचे सासरे घरी परतले. त्यावेळी त्यांना नातवाच्या रडण्याचा आवाज आला. कोमल ला हाक मारूनही ती प्रतिसाद देत नव्हती. तर नातू जोरजोरात रडत असल्याने त्यांनी खिडकीतून डोकावून पाहिले. आणि समोरील दृश्य पाहून ते हादरले.
कोमलने गळफास घेतला होता, तर तिला त्या अवस्थेत पाहून लहानगा नातू ओक्साबोक्शी रडत होता. त्यांनी तातडीने मुलाला फोन करून बोलावून घेतले. यानंतर कोमलला शहरातील एका खासगी रुग्णालयात नेण्यात आले. तेथे तिला मृत घोषित करण्यात आले. या घटनेची नोंद चिपळूण पोलीस ठाण्यात करण्यात आली असून अधिक तपास सुरू आहे. कोमल उच्चविद्याविभूषित होती. तिच्या मृत्यूने हळहळ व्यक्त होत आहे.
