(नवी दिल्ली)
नव्या संसदेच्या उद्घाटनादरम्यान सरकारचा निषेध करण्यासाठी तेथे जाण्याच्या प्रयत्नात असणाऱ्या कुस्तीपटू आंदोलकांना पोलिसांनी रोखल्यामुळे रविवारी सकाळी दिल्लीतील जंतर-मंतरवर मोठा राडा झाला.
आंदोलक पैलवानांनी बॅरिकेड्स तोडून नवीन संसदेकडे जाण्याचा प्रयत्न केला. त्यामुळे पोलिसांनी त्यांना ताब्यात घेण्याची प्रक्रिया सुरू केली. यावेळी आंदोलक पैलवान आणि पोलिसांमध्ये झटापट झाल्याचे पहायला मिळाले.
विनेश फोगट, संगीता फोगट, साक्षी मलिक, बजरंग पुनिया यांच्यासह अनेकांना पोलिसांनी ताब्यात घेतले. यानंतर पोलिसांनी जंतर-मंतर येथील धरणे आंदोलनाचा मंडप आणि खुर्च्या हटवल्या. यावर आंदोलकांसह विरोधकांनी टीका केली. देशात दडपशाही सुरू असून पोलिसांकरवी आमचे आंदोलन चिरडण्याचा प्रयत्न होत असल्याची टीका आंदोलक कुस्तीपटूंसह विरोधकांकडून करण्यात आली.
