(संगलट-खेड /इक्बाल जमादार)
दापोली तालुकास्तरीय पावसावी क्रीडा स्पर्धेत आर. जी.पवार माध्यमिक शाळा माटवण ता.दापोली जि.रत्नागिरी या यजमान शाळेच्या प्रांगणात १४ ते १९ वयोगटातील विद्यार्थ्यांच्या खो- खो क्रीडा स्पर्धा सुरु असून दि.६ सप्टे.रोजी झालेल्या स्पर्धेत आर.जी.पवार माध्यमिक शाळा माटवण शाळेतील १४ वर्षाखालील मुलांच्या संघाने चिखलगाव संघाविरुद्ध अंतिम फेरी जिंकून जिल्हास्तरीय स्पर्धेसाठी दापोली तालुक्याचे प्रतिनिधित्व करण्याचा मान पटकावला आहे. संघ व्यवस्थापक अविनाश महाडिक तसेच मार्गदर्शक दिपक पवार यांच्या मुळेच आज हा रोमहर्षक विजय मिळवू शकलो असे संघातील खेळाडूंनी यावेळी सांगितले. तसेच कोंथळकोंड येथील श्रेयस बापूराव मुरचवडे या विद्यार्थ्याने सलग पाच मिनिटे आऊट न होता आपल्या बहारदार प्रदर्शनाने सर्व क्रीडा रसिकांची मने जिंकली.
अंतिम फेरी जिंकताच माटवण हायस्कूलच्या मैदानावर एकच जल्लोष करण्यात आला . १९९२ बॅचच्या माजी विद्यार्थ्यांचा सुद्धा या स्पर्धेमध्ये प्रत्यक्ष – अप्रत्यक्ष सहभाग आहे, ही निश्चितच आनंदाची गोष्ट असल्याचे अविनाश महाडिक यांनी यावेळी सांगितले. तालुका क्रीडा समन्वयक यांनी सुद्धा ९२ च्या बॅचचे विशेष कौतुक केलं आहे. शाळेचे मुख्याध्यापक कोंडिकिरे, त्यांचे सर्व सहकारी शिक्षक स्पर्धा यशस्वी करणेसाठी प्रयत्न करीत आहेत.
