( संगमेश्वर / प्रतिनिधी )
घरफोडीत चोरटयांना काहीच हाती न लागल्याने चोरटयांनी घरातील माचिस बॉक्स आणि बॉक्समधील तेलाच्या पिशव्या चोरल्याची अजब घटना संगमेश्वर तालुक्यातील फुणगूस येथे घडली. याबाबतची फिर्याद श्रीमती सुनिता सुनील चव्हाण (54, फुणगुस, संगमेश्वर) यांनी संगमेश्वर पोलीस ठाण्यात दिली.
पोलिसांनी दिलेल्या माहितीनुसार, सुनीता चव्हाण या आपल्या घराला कुलुप लावून 24 डिसेंबर ते 7 जानेवारी पर्यंत बदलापूर मुंबई येथे गेल्या होत्या. 7 जानेवारी रोजी त्या घरी आल्या असता घरातील सामान अस्ताव्यस्त दिसून आले. चोरटयाने घराच्या मागील बाजूचा सिमेंटचा दरवाजा तोडून किचन रुममधील बॉक्स मध्ये ठेवलेल्या 1 लीटरच्या 8 तेलपिशव्यांची चोरी केली तसेच 20 रुपये किंमतीचा माचिस बॉक्सही चोरुन नेला. असा एकूण 1580 रुपयांचा मुद्देमाल चोरीस गेल्याचे त्यांनी फिर्यादीत म्हटले आहे. संगमेश्वर पोलिसांनी अज्ञातावर भादविकलम 454, 457, 380 नुसार गुन्हा दाखल केला आहे.
