(खेड / भरत निकम)
ज्ञानदीप काॅलेज ऑफ आर्किटेक्चर बोरज तर्फे घेण्यात आलेल्या डिजाईन आयडिया स्पर्धेचा निकाल नुकताच जाहीर झाला. या स्पर्धेमध्ये रोटरी इंग्लिश मिडिअम स्कूलच्या वाणिज्य शाखेतील २ विद्यार्थिनींनी उज्ज्वल यश संपादित करून रोटरी स्कूलची यशोगाथा कायम राखली आहे.
डिजाईन आयडिया स्पर्धेत रोटरी इंग्लिश मिडिअम स्कूलच्या वाणिज्य शाखेतील इ.१२ वीच्या २ विद्यार्थिनींनी यश संपादन केले. यामध्ये आयेशा तिसेकर हिने प्रथम क्रमांक तसेच कु. रिया मोरे हिने द्वितीय क्रमांक पटकावून डिजाईन आयडिया स्पर्धेत आपले व आपल्या प्रशालेचे नाव उज्ज्वल केले. त्यांच्या या यशामुळे शाळेमध्ये आनंदाचे वातावरण निर्माण झाले आहे. या यशस्वी विद्यार्थिनींना रोख रक्कम व प्रशस्तीपत्रक देऊन गौरविण्यात आले.
वरील सर्व यशस्वी विद्यार्थिनींना कला विभागप्रमुख सौ. मानसी देवघरकर व कला शिक्षक शुभम जड्याळ यांचे मोलाचे मार्गदर्शन लाभले. सर्व यशस्वी विद्यार्थिनींचे संस्थेचे चेअरमन मा. बिपीनदादा पाटणे, सर्व पदाधिकारी, शाळेच्या मुख्याध्यापिका सौ. भूमिता पटेल, सर्व शिक्षक व शिक्षकेतर कर्मचारी यांनी अभिनंदन करून पुढील वाटचालीस शुभेच्छा दिल्या.
