गुहागर : गुहागर तालुक्यातील शृंगारतळी, वेळंबरोड, गणेशनगर गुहागर येथे घर फोडून दागिन्यांसह रोख रक्कमेची चोरी झाल्याची घटना घडली आहे. ही घटना 19 फेब्रुवारी रोजी सकाळी 7.30 ते सायंकाळी 4 वा. च्या सुमारास घडली.
पोलिसांनी दिलेल्या माहितीनुसार, संगीता मोहिते (55, शृंगारतळी, गुहागर) या बाहेर गेलेल्या असताना. घर बंद असल्याची संधी साधत अज्ञाताने घराच्या पाठीमागील सिमेंटचा दरवाजा फोडून हॉलमधील लोखंडी कपाटात ठेवलेल्या सोन्याच्या दागिन्यांसह 67 हजार 500 रुपयांची चोरी केली. संगीता यांनी घरी आल्यावर पाहिले असता घरातील सामान विस्कटलेले दिसले. कपाटात ठेवलेल्या वस्तू 1 ग्रॅम वजनाची सोन्याची अंगठी, 2 ग्रॅम वजनाची सोन्याची कर्णफुले, 1 ग्रॅम वजनाची सोन्याची नथ, 65 हजार रोख रक्कम असा एकूण 67 हजार 500 रुपयांची माल चोरीस गेल्याचे त्यांच्या लक्षात आले.
त्यांनी याबाबतची तक्रार येथील पोलीस स्थानकात दाखल केली. पोलिसांनी अज्ञातावर भादविकलम 454, 380 नुसार गुन्हा दाखल केला आहे. अधिक तपास सहाय्यक पोलीस फौजदार पवार करत आहेत.
