(खेड / इक्बाल जमादार)
खेड कर्जी येथील रहिमत मोहल्ला व गवळवाडीकडे जाणारा रहदारीचा रस्ता दोन्ही बाजूने खचल्याने या रस्त्यावरून चालणे धोक्याचे झाले आहे. सध्या असलेल्या अतिवृष्टीमुळे हा रस्ता पूर्ण वाहून जाण्याची शक्यता आहे. याबाबत रहिमत मोहल्ला व गवळवाडी येथील ग्रामस्थांना कल्पना देऊन या रस्त्यावरून वाहतूक किंवा रहदारी करु नये यासाठी तलाठी कार्यालयाकडून सूचना देण्यात आल्या आहेत.
रहिमत मोहल्ला येथे एकूण 104 कुटुंब असून 365 लोकसंख्या आहे. गवळीवाडी येथे 80 कुटुंब असून 275 लोकसंख्या आहे. मात्र दोन दिवस कोसळत असलेल्या पावसामुळे रस्त्यावर परिणाम होऊन वाहून जाण्याची शक्यता आहे. याचा विचार करून तलाठी कार्यालयाकडून रेशन दुकानदार मुश्ताक तांबे यांना रहिमतमोहल्ला व गवळवाडी येथील ग्रामस्थांना शासकीय शिधा वाटप प्राप्त झाल्यावर त्वरित ग्रामस्थांना वाटप करण्याच्या सूचना देण्यात आल्या आहेत. ग्रामस्थांच्या शिधावाटपाबाबत कोणतीही अडचण येऊ नये अशा सूचनाही देण्यात आल्या आहेत. या रस्त्यावरुन शाळेतील मुलांची रहदारी आहे. त्यामुळे त्यांनाही सुरक्षा बाबतीतील सूचना देण्यात आल्या आहेत.
