(जाकादेवी / संतोष पवार)
रत्नागिरी तालुक्यातील खालगाव-जाकादेवी बाजारपेठेत खालगाव प्रिमियर लिगच्यावतीने मोफत वृत्तपत्र वाचनालय सुरू करण्यात येणार असून मोफत वृत्तपत्र वाचनालयाचा उद्घाटन समारंभ खालगाव ग्रामस्थांच्या प्रमुख उपस्थितीत रविवार दि.२५ डिसेंबर रोजी सकाळी ९.३० वाजता रिक्षा स्टँड जाकादेवी येथे संपन्न होणार आहे.
खालगाव गावासह मुख्य जाकादेवी बाजारपेठेतील नागरिकांना, तसेच शाळा महाविद्यालयीन अध्ययनार्थींना जगातील घडामोडींची माहिती मिळावी,जनरल नॉलेजच्या दृष्टीने तसेच करियर विषयक शासकीय, निमशासकीय क्षेत्रातील जाहिराती,नवनव्या घटनांची अद्ययावत माहिती व्हावी या उद्देशाने खालगाव प्रिमियर लिग (के. पी.एल.) यांच्यामार्फत मोफत वृत्तपत्र वाचनालय सुरू करण्याचा संकल्प करण्यात आला आहे. या मोफत वाचनालयात स्थानिक दैनिकासह दैनिक लोकसत्ता, दैनिक सामना ही प्रादेशिक वृत्तपत्रही या मोफत वृत्तपत्र वाचनालयात उपलब्ध होणार आहे. सदरची वृत्तपत्र माथाडी कामगार नेते अरुण शंकर पवार आणि खालगांव प्रिमियम लिगचे सल्लागार चंद्रकांत नारायण धामणे यांच्या सौजन्याने उपलब्ध होणार आहेत.
तरी परिसरातील वाचनप्रेमी नागरिकांनी, ग्रामस्थांनी, शिक्षणप्रेमींनी या मोफत वृत्तपत्र वाचनालयाचा जरूर लाभ घेण्याचे आवाहन प्रिमियर लिगचे अध्यक्ष प्रशांत गणपत पवार यांनी केले आहे.
