(मुंबई / किशोर गावडे)
खेलो इंडिया आणि स्पोर्ट्स अथॉरिटी ऑफ इंडिया तर्फे जागतिक महिला दिनाच्या निमित्ताने १० ते २५ मार्च या कालावधीत विविध उपक्रमांचे आयोजन केले आहे. त्या अंतर्गत वरिष्ठ महिला कबड्डी खेळाडूंसाठी १७ मार्च रोजी सायंकाळी ०४:०० वाजता प्रदर्शनीय सामना आयोजित करण्यात आला होता.
या प्रदर्शनीय सामन्यासाठी सर्व माजी राष्ट्रीय व आंतरराष्ट्रीय खेळाडू शिवछत्रपती पुरस्कार महिला खेळाडूंनी इतका चांगला प्रतिसाद दिला की, एका सामन्याऐवजी स्पर्धा आयोजित केली गेली. या स्पर्धेला प्रमुख पाहुण्या म्हणून अर्जुन पुरस्कार विजेती मोनिका नाथ बाक्रे, पहिल्या छत्रपती पुरस्कार विजेत्या चित्रा नाबर केरकर, छत्रपती पुरस्कार विजेत्या शैलजा पेडणेकर, पश्चिम रेल्वेच्या वरिष्ठ प्रशिक्षिका हेमलता मांढरे (वय 70 वर्षे) तसेच साईचे रिजनल डायरेक्टर पांडुरंग चाटे (IRS) उपस्थित होते. तर आंतरराष्ट्रीय खेळाडू ललिता सुर्वे भोसले, लता पांचाळ, संपूर्णा कदम आणि प्रतिभा मांजरेकर यां खेळाडूनी सक्रीय सहभाग घेतला.
या स्पर्धेमुळे खूप दिवसांनी सर्वांना खेळायची आणि एकमेकांना भेटायची संधी मिळाल्यामुळे या सर्व सहभागी खेळाडूंनी स्पर्धेचा आनंद लुटला. सिमरत गायकवाड आणि भारतीय क्रीडा प्राधिकरण येथील कबड्डी खेळाडूंनी नेटके आयोजन केले होते. त्यांचे सर्व सहभागी खेळाडूंनी कौतुक केले. आंतरराष्ट्रीय खेळाडू ललिता भोसले, लता पांचाळ, संपूर्णा कदम यांचे या स्पर्धसाठी विशेष सहकार्य मिळाले.
