ऑस्ट्रेलियाला आणखी एक धक्का देणारी घटना घडली आहे. रॉड मार्श आणि शेन वॉर्नसारख्या दिग्गजांनी जगाचा निरोप घेतल्यानंतर आता सायमंड्सचेही आज कार अपघातात निधन झाल्याने ऑस्ट्रेलिया ‘क्रिकेटसाठी हा आणखी एक दुःखाचा दिवस आहे.
ऑस्ट्रेलियाचा माजी क्रिकेटपटू अँड्र्यू सायमंड्सचा कार अपघातात मृत्यू झाला आहे. तो ४६ वर्षांचा होता. सायमंड्सच्या कारचा अपघात शनिवारी रात्री १०.३० वाजण्याच्या सुमारास झाला. सायमंड्स स्वतः कार चालवत होता. अचानक त्यांची कार रस्ता सोडून पलटी झाली. यामध्ये तो जखमी झाला. हा अपघात कसा झाला याचा तपास फॉरेन्सिक क्रॅश युनिट करत आहे.
ऑस्ट्रेलियासाठी २६ कसोटी सामने खेळलेल्या सायमंड्सने एकदिवसीय क्रिकेटमध्ये उत्कृष्ट कामगिरी केली होती. सायमंड्स हा १९९९-२००७ च्या क्रिकेट विश्वावर राज्य करणाऱ्या ऑस्ट्रेलिया संघाचा महत्त्वाचा भाग होता. सायमंडच्या मृत्यूने क्रिकेट विश्वात शोककळा पसरली आहे.
