(नवी दिल्ली)
देशातील मोठी लोकसंख्या एलपीजी सिलिंडरचा वापर करते. हे गॅस कनेक्शन घेण्यासोबत तुम्हाला 50 लाख रुपयांपर्यंतचा विमाही मिळालेला असतो. याला एलपीजी विमा संरक्षण म्हणतात. गॅस सिलिंडरमुळे कोणत्याही प्रकारची जीवित व वित्तहानी झाल्यास विम्याच्या रकमेतून त्याची भरपाई केली जाते. गॅस सिलिंडरवरील हा विमा पूर्णपणे मोफत उपलब्ध आहे. म्हणजे यासाठी तुम्हाला कोणत्याही प्रकारचा प्रीमियम भरावा लागत नाही.
गॅस कनेक्शन मिळताच तुम्हाला काही अटींसह 40 लाख रुपयांचा अपघाती विमा मिळतो. यासाठी पेट्रोलियम कंपनीचा विमा कंपनीशी पूर्व करार असतो. अपघातात जीवितहानी झाल्यास 50 लाख रुपयांपर्यंत दावा केला जाऊ शकतो. यासोबतच इतर काही अटींचाही समावेश असून ज्यांची पूर्तता केल्यानंतरच विम्याच्या रकमेवर दावा करता येईल.
हा विमा घेण्यासाठी काही आवश्यक अटींचे पालन करणे अत्यंत आवश्यक आहे. पहिली अट अशी आहे की ज्यांच्या सिलेंडरचे पाईप, स्टोव्ह आणि रेग्युलेटर आयएसआय मार्कचे आहेत त्यांनाच विम्याचा लाभ मिळेल. दाव्यासाठी तुम्ही सिलिंडर आणि स्टोव्हची नियमित तपासणी करणे आवश्यक असते. याशिवाय ग्राहकाला अपघात झाल्याच्या 30 दिवसांच्या आत त्याच्या वितरकाला आणि पोलिस ठाण्यात अपघाताची तक्रार करावी लागेल. दाव्यादरम्यान एफआयआर प्रत, वैद्यकीय पावती, रुग्णालयाचे बिल, शवविच्छेदन अहवाल आणि मृत्यू प्रमाणपत्र यासारखी कागदपत्रे आवश्यक असतात.
तुम्ही विम्याच्या या सर्व अटी पूर्ण केल्या तर तुम्ही विम्याचा दावा करू शकता. विमा दाव्यादरम्यान, आपला स्थानिक वितरक पेट्रोलियम कंपनी आणि विमा कंपनीला सदर अपघाताची माहिती देतो. यानंतर तुम्हाला विम्याची रक्कम मिळते.
हे लक्षात ठेवा
सिलिंडर घेताना त्याची एक्सपायरी डेट एकदा तपासा कारण विमा सिलिंडरच्या एक्सपायरी डेटशी जोडलेला असतो. सिलेंडरची एक्सपायरी डेट सिलिंडरच्या वरच्या बाजूला तीन रुंद पट्ट्यांवर कोडच्या स्वरूपात लिहिली जाते. हा कोड A-24, B-25, C-26 किंवा D-27 असे लिहिलेला आहे. या कोडमध्ये, ABCD म्हणजे महिना आणि अंकांच्या स्वरूपात लिहिलेली अक्षरे वर्षाबद्दल सांगतात. A म्हणजे जानेवारी, फेब्रुवारी आणि मार्च, B म्हणजे एप्रिल, मे आणि जून, C म्हणजे जुलै, ऑगस्ट, सप्टेंबर आणि D म्हणजे ऑक्टोबर, नोव्हेंबर आणि डिसेंबर. अशाप्रकारे A-24 म्हणजे तुमचा सिलेंडर 2024 मध्ये जानेवारी ते मार्च दरम्यान एक्सपायर होईल.
