(जाकादेवी/संतोष पवार)
रत्नागिरी तालुक्यातील चाफे येथील मोहिनी मुरारी शिक्षण संस्थेतर्फे जाकादेवी मंदिरापासून ते चाफे येथील मोहिनी मुरारी मयेकर महाविद्यालयाच्या श्री.गोपाळ कृष्ण मंदिरापर्यंत सुमारे तीन किलोमीटर अंतरापर्यंत वारकरी दिंडीचे आयोजन करण्यात आले होते. या दिंडीत चाफे येथील मोहिनी मुरारी मयेकर महाविद्यालयाचे विद्यार्थी तसेच जाकादेवी प्रशाला व कनिष्ठ महाविद्यालयातील निवडक विद्यार्थी वारकरी गणवेशामध्ये मोठ्या भक्तिभावाने व उत्साहाने सहभागी झाले होते.
पंढरपूर येथे प्रत्यक्ष पांडुरंगाचे दर्शन घेणे शक्य होत नाही किंवा वारीमध्ये सहभागी होता येत नाही,असे असले तरी आषाढी एकादशीचे औचित्य साधून मनी श्रध्दा, भक्तीभाव ठेवून पांडुरंगाचे, देवाचे नामस्मरण करून या दिंडीमध्ये विद्यार्थ्यांनी अभंग, किर्तन ,गात टाळ मृदंगाच्या तालावर अतिशय मोठ्या भक्ती भावात सर्वच विद्यार्थी तल्लीन होऊन गेले. विठ्ठल-रुक्मिनीचे नामस्मरण करीत पायी चालत ही दिंडी काढण्यात आली.जाकादेवी देवस्थान, मुख्य बाजारपेठ ते चाफे मुख्य मार्गावरून काढण्यात आलेल्या या दिंडीचे अनेक भाविकांनी उत्स्फूर्त स्वागत केले.
या आषाढी एकादशीच्या निमित्ताने काढण्यात आलेल्या विद्यार्थी वारकरी दिंडीच्या उद्घाटनप्रसंगी राष्ट्रीय कीर्तनकार व वारकरी संप्रदायातील सक्रिय भाविक,संत वाड्मयाच्या अभ्यासक श्रीमती अरुणा साळवी यांनी वारकरी संप्रदाय तसेच आषाढी एकादशीच्या निमित्ताने वारकरी दिंडीचे महत्त्व विशद करून विद्यार्थ्यांच्या मनामध्ये अध्यात्माविषयी उदबोधन केले.
विशेष म्हणजे या दिंडीमधून सामाजिक विषयांवर प्रकाशझोत टाकण्यात आला. परिसर स्वच्छता, कोरोना प्रतिबंधक उपाय, आरोग्य संवर्धन अशा सामाजिक बाबींवर घोषवाक्य, माहिती वर्ग या दिंडीमध्ये लक्षवेधी ठरला.
या वारकरी दिंडीमध्ये मालगुंड एज्युकेशन सोसायटीचे तसेच मोहिनी मुरारी मयेकर शिक्षण संस्थेचे चेअरमन सुनिल उर्फ बंधू मयेकर, उपाध्यक्ष काका साळवी, सचिव रोहित मयेकर, ऋषिकेश मयेकर, संचालक सुरेंद्र माचिवले ,श्रीमती दिप्ती मयेकर ,शुभदा मयेकर , मालगुंड शिक्षण संस्थेचे सचिव विनायक राऊत , संचालक किशोर पाटील, श्रीकांत मेहेंदळे,चाफे गावच्या सरपंच सौ.गोवळकर,ओरीचे उपसरपंच संकेत देसाई, महाविद्यालयाच्या प्राचार्या स्नेहा पालये, उपप्राचार्य गणेश कुळकर्णी,जाकादेवी प्रशालेचे मुख्याध्यापक बिपिन परकर, शिरीष मुरारी मयेकर विद्यालयाचे मुख्याध्यापक महेश धनवडे,वृत्तसंकलन संतोष पवार यांसह शिक्षण संस्थांचे पदाधिकारी, शिक्षक, प्राध्यापक, शिक्षकेतर कर्मचारी, हितचिंतक बहुसंख्येने उपस्थित होते.
या वारकरी दिंडीमुळे जाकादेवी चाफे परिसरातील नागरिकांमध्ये भक्तीभावाचे वातावरण निर्माण झाले. यापुढे प्रत्येक वर्षी मोहिनी मुरारी शिक्षण संस्थेतर्फे भव्य वारकरी दिंडीचे आयोजन करण्यात येणार असल्याचे युवा नेते व शिक्षण संस्थेचे सचिव रोहित मयेकर यांनी आवर्जून सांगितले. दिंडीत सहभागी विद्यार्थी वारकरी व मार्गदर्शक शिक्षक,जाकादेवी देवस्थान मंडळ तसेच विद्यार्थी, विद्यार्थ्यांचे पालक यांना चेअरमन सुनिल मयेकर यांनी मनापासून धन्यवाद दिले.
