(हर्णे / वार्ताहर)
वराडकर – बेलोसे महाविद्यालयात ६ जानेवारी २०२३ रोजी पत्रकार परिषदेचे आयोजन करण्यात आले होते. यावेळी पत्रकार दिनानिमित्त दापोली येथील पत्रकारांचा शाल, पुष्पगुच्छ व भेटवस्तू देऊन सभापती जानकीताई बेलोसे, कार्यवाह डॉ. दशरथजी भोसले व प्राचार्य डॉ. भारत कऱ्हाड यांच्या हस्ते सत्कार करण्यात आला. प्राचार्य डॉ.भारत कऱ्हाड यांनी प्रास्ताविक व उपस्थितांचे स्वागत केले. आद्य पत्रकार बाळशास्त्री जांभेकर यांच्या १९१ व्या जयंतीनिमित्त प्रतिमेचे पूजन संस्था सभापती जानकीताई बेलोसे यांच्या हस्ते करण्यात आले.
संस्थेचे कार्यवाह डॉ.दशरथ भोसले यांनी पत्रकार परिषदेत संस्थेच्या नवनिर्वाचित कार्यकारिणीची माहिती दिली व संस्थेने जुन्या जाणकार मंडळी बरोबरच नवीन उपाध्यक्ष श्री. आदित्य बेलोसे व संचालक श्री. सुनील चव्हाण यांची निवड केल्याचे सांगितले. संस्थेचे नवनिर्वाचित अध्यक्ष आमदार श्री.संजय जगताप यांच्या नेतृत्वाखाली आगामी काळात महाविद्यालयाची प्रगती होईल अशी आशा व्यक्त केली. तसेच संस्था व महाविद्यालयातील विविध उपक्रम व विकास कामांची माहिती दिली.
यावेळी पत्रकार श्री.प्रशांत परांजपे, श्री.राजगोपाल मयेकर, श्री.प्रशांत कांबळे, श्री.शैलेंद्र केळकर, सौ. ज्योती बिवलकर, श्री. प्रसाद रानडे, मनोज पवार, शिवाजी गोरे, जगदीश वामकर यांनी मनोगत व्यक्त केले. सभापती जानकीताई बेलोसे यांनी सर्व उपस्थित पत्रकारांना शुभेच्छा दिल्या व महाविद्यालयाच्या विकासासाठी सर्वांनी योगदान द्यावे, असे आवाहन केले. श्री.एल.पी.पाटील यांनी कार्यक्रमाचे सूत्रसंचालन केले व आभार मानले.
