(बंगळुरू)
इस्त्रोने ‘चांद्रयान ३’च्या यशानंतर आता सूर्याच्या अभ्यासासाठी मोठे पाऊल उचलले आहे. इस्त्रोने काही दिवसांपूर्वी सूर्याच्या अभ्यासासाठी ‘आदित्य एल १’ लाँच केले आहे. ‘आदित्य एल १’ संदर्भात आता इस्त्रोने अपडेट दिली आहे. आदित्य-एल १ अंतराळयानाने ६ ऑक्टोबर रोजी सुमारे १६ सेकंदांसाठी ट्रॅजेक्टोरी करेक्शन मॅन्युव्हर केले आणि आता ते सूर्य-पृथ्वी लॅग्रेंज पॉईंट १ च्या दिशेने जात आहे. इस्त्रोने ट्वीटरवर ही माहिती दिली आहे. ट्वीटमध्ये म्हटले आहे की, अंतराळयान सुस्थितीत आहे आणि सूर्य-पृथ्वी एल १ च्या दिशेने जात आहे.
इस्रोने सांगितले की, १९ सप्टेंबर रोजी पार पडलेल्या ट्रान्स-लॅग्रॅन्गियन पॉईंट १ इन्सर्शन युक्तीचा मागोवा घेतल्यानंतर मूल्यमापन केलेले मार्गक्रमण सुधारण्यासाठी टीसीएम आवश्यक होते. टीसीएम हे सुनिश्चित करते की अंतराळयान एल १ च्या आसपास प्रभामंडल कक्षेच्या प्रवेशाच्या दिशेने त्याच्या इच्छित मार्गावर राहते.
इस्रोने दिलेल्या माहितीनुसार, ‘आदित्य-एल १’ प्रगतिपथावर असल्याने काही दिवसांतच मॅग्नेटोमीटर पुन्हा सुरू होईल. ३० सप्टेंबर रोजी, आदित्य-एल १ अंतराळयान पृथ्वीच्या प्रभावक्षेत्रातून यशस्वीरीत्या बाहेर पडले आणि सूर्य-पृथ्वी लँग्रेज पॉईंट १ (एल१) च्या दिशेने मार्गक्रमण करू लागले.
आदित्य-एल १ ऑर्बिटर वाहून नेणारे पीएसएलव्ही-सी ५७.१ रॉकेट २ सप्टेंबर रोजी आंध्र प्रदेशातील श्रीहरिकोटा येथील सतीश धवन अंतराळ केंद्रातून प्रक्षेपित करण्यात आले. पहिल्या सौर मोहिमेचे हे प्रक्षेपण इस्रोच्या ऐतिहासिक चंद्र लँडिंग मिशन चांद्रयान-३ नंतर काही आठवड्यांनंतर झाले. इस्रोनुसार, आदित्य-एल१ मिशन ४ महिन्यांत त्याच्या निरीक्षणाच्या टप्प्यावर पोहोचेल.
इस्रोने दिलेल्या माहितीनुसार ते सूर्याच्या दिशेने पृथ्वीपासून १.५ मिलियन किलोमीटर अंतरावर असलेल्या लॅग्रॅन्गियन पॉईंट १ च्या भोवतालच्या हॉलो ऑर्बिटमध्ये ठेवले जाईल. अंतराळयान सूर्याचा अभ्यास करण्यासाठी डिझाईन केलेले ७ वेगवेगळ्या पेलोडसह सुसज्ज आहे. यापैकी ४ पेलोड्स सूर्याच्या प्रकाशाचे निरीक्षण करतील, तर उर्वरित ३ प्लाझ्मा आणि चुंबकीय क्षेत्राचे इन-सीटू पॅरामीटर्स मोजतील.
