(संगमेश्वर / प्रतिनिधी)
चिपळूण-संगमेश्वर विधानसभा मतदार संघातील संगमेश्वर तालुक्यातील बामणोली गावातील शिवसेना (उबाठा) शाखाप्रमुख आणि माजी सरपंच विद्यमान ग्रामपंचायत सदस्यांसह प्रमुख ग्रामस्थांनी जनसंपर्क कार्यालय, सावर्डे येथे आमदार शेखर निकम यांची भेट घेतली. त्यांनी उपस्थित पदाधिकारी व कार्यकर्त्यांच्या उपस्थितीत राष्ट्रवादी काँग्रेस पक्षात प्रवेश केला. नेतृत्वावर विश्वास ठेवून पक्षात प्रवेश करणाऱ्या प्रत्येकाचा सन्मानच होईल, अशी ग्वाही आमदार शेखर निकम यांनी दिली.
बामणोली येथील माजी सरपंच आणि विद्यमान ग्रामपंचायत सदस्या अर्चना कांबळे, शाखाप्रमुख शिवसेना (उबाठा) सीताराम माईन यांच्यासह दत्ताराम राणे, सुषमा दळवी, अनिल गुरव, सुयश गुरव, एकनाथ बेटकर, सहदेव बारे, गंगाराम भिसे, प्रकाश जाधव आदी प्रमुख ग्रामस्थांनी आमदार निकम यांच्या कार्यपद्धतीवर विश्वास ठेवून राष्ट्रवादी काँग्रेस पक्षात प्रवेश केला. आमदार निकम यांनी त्या सर्वांचे पक्षात स्वागत केले. बामणोलीतील ग्रामस्थांनी आमदार निकम यांचा गौरव केला.
आमदारांनी अडीच वर्षात आरोग्यसेवा, पाणीप्रश्न, ग्रामपंचायत विकास, रोजगार, शेती विकास, पर्यटन विकास, ऐतिहासिक वारसा जपणूक, कला-क्रीडा, शैक्षणिक विकास, आपत्ती निवारण यांसह विविध विकासकामे केली. विविध योजनेंर्तगत कोट्यवधीचा निधी मंजूर करून आणला. हा निधी नियोजनबद्ध खर्च करून गावागावाचा विकास करत एक आदर्श नेतृत्वाचा ठसा उमटवल्याबद्दल ग्रामस्थांनी समाधान व्यक्त केले.
आगामी निवडणुकीत आमदार निकम यांच्या पाठीशी ठामपणे उभे राहून बामणोली गावात राष्ट्र्वादी काँग्रेसचा झेंडा डौलाने फडकवण्याचा निर्धारही या प्रसंगी ग्रामस्थांनी केला. या कार्यक्रमाला शिरीष दळी, नितीन भोसले, मंगेश बांडागळे, किसन राणे, संग्राम राणे, गणपत बेटकर, सुरेश माईन, ओमकार गायकवाड इ. कार्यकर्ते व पदाधिकारी उपस्थित होते.
अश्वासनांची पूर्तता करणार
याप्रसंगी आमदार निकम म्हणाले, माझ्यावर विश्वास दाखवून मला जनतेने निवडून दिले आहे. चार वर्षामध्ये महामारी, नैसर्गिक आपत्तीना तोंड देत जी निवडणूक काळात मतदार संघात अश्वासने दिली गेली ती बऱ्याचशा प्रमाणात पूर्णत्वास नेण्याचा प्रयत्न केला आहे.
काही कामे झाली नसतील, दुर्लक्षित राहिली असतील ती नेटाने पूर्ण करण्याचा प्रयत्न पुढील काळात करणार आहे. बामणोलीतील ग्रामस्थांनी राष्ट्रवादी काँग्रेस पक्षात प्रवेश केला, त्यांचे आभार आहेत. त्यांच्या पाठबळामुळे भविष्यात चांगले काम करण्याची ताकद मिळते.
