(लांजा)
येथील न्यू एज्युकेशन सोसायटी, लांजे संचालित कला, वाणिज्य व विज्ञान महाविद्यालयाचे प्राचार्य डॉ. अरविंद कुलकर्णी यांना मुंबईतील ठाकूर ट्रस्ट संचालित विज्ञान व वाणिज्य महाविद्यालयाच्या वतीने मानाचा “उत्कृष्ट प्राचार्य पुरस्काराने गौरविण्यात आले.
मुंबईतील ठाकूर ट्रस्ट संचालित विज्ञान व वाणिज्य महाविद्यालयाच्या रौप्य महोत्सवी वर्षपूर्ती निमित्त आयोजित सत्कार समारंभात राष्ट्रीय स्तरावरील दिला जाणारा मानाचा “उत्कृष्ट प्राचार्य” हा पुरस्कार मुंबई विद्यापीठ कुलगुरू प्रा. डॉ. सुहास पेडणेकर यांच्या हस्ते प्रदान करण्यात आला.
याप्रसंगी मुंबई विद्यापीठाचे कुलसचिव डॉ. सुधीर पुराणिक, ठाकूर शैक्षणिक संस्थेचे सचिव जितेंद्र ठाकूर, ट्रस्टी रमेश ठाकूर, प्राचार्य डॉ. चैताली चक्रवर्ती यांच्या उपस्थितीत हा समारंभ पार पडला. मुंबईतील हॉटेल ललित येथे सदर कार्यक्रम आयोजित करण्यात आला होता. या कार्यक्रमात देशभरातील शिक्षण क्षेत्रातील विविध विभाग व स्तरावर महत्त्वपूर्ण कार्य करणाऱ्या २४ विद्वानांचा सत्कार करण्यात आला.
या बद्दल प्राचार्य अरविंद कुलकर्णी यांचे न्यू एज्युकेशन सोसायटीचे कार्याध्यक्ष माननीय जयवंत शेट्ये, उपकार्याध्यक्ष सुनील कुरूप, मुख्य कार्यकारी अधिकारी श्रीराम वंजारे, सचिव विजय खवळे, सहसचिव संजय तेंडुलकर आणि इतर पदाधिकारी यांनी हार्दिक अभिनंदन केले. तसेच महाविद्यालयाचे उपप्राचार्य डॉ. काशिनाथ चव्हाण सर्व प्राध्यापक व प्राध्यापकेतर कर्मचारी यांनीही अभिनंदन केले.
