(साईशा / राजापूर)
राजापूर रेल्वेस्टेशन रस्त्यावरील ससाळे एसटी थांबा येथे शुक्रवारी सकाळी पिंपळाची फांदी पडल्याने वाहतूक काही काळ ठप्प झाली होती. मात्र काही वेळानंतर हे झाड बाजूला करण्यात आल्यानंतर वाहतूक सुरळीत झाली.
ससाळे एसटी थांब्यानजीक पिंपळाचे झाड आहे. ते जुनाट असल्याने केव्हाही कोसळून पडण्याची शक्यता आहे. या पिंपळाच्या काही फांद्या रस्त्यावर आल्या आहेत. त्यातीलच एक फांदी शुक्रवारी रस्त्यावर पडल्याने वाहतूक ठप्प झाली होती. रेल्वेस्टेशनहून प्रवाशांना घेऊन जाणार्‍या खासगी वाहनधारकांना याचा फटका बसला होता. थ्री व टू व्हीलर वाहनांनी बौध्दवाडीमार्गे रस्त्याने ये-जा केली. मात्र मोठ्या वाहनाधारकांना झाड बाजूला करेपर्यत वाट पहावी लागली.
झाडाची फांदी कोसळल्याची माहिती मिळताच सार्वजनिक बांधकाम विभागाने त्वरित या ठिकाणी पोहोचून रस्त्यावरील फांदी बाजूला करून वाहतूक सुरळीत केली. यामुळे सकाळी 10 वा. नंतर सर्व वाहतूक सुरळीत चालू झाली.
