(खेड/इक्बाल जमादार)
भारत सरकार आयोजित एस. एन. बी. पी. इंटरनॅशनल स्कूल वाघोली, पुणे येथे मिशन ऑलिंपिक ओपन राज्यस्तरीय स्टेट स्केटिंग स्पर्धा नुकतीच पार पडली. या स्पर्धेत रोटरी स्कूलच्या कु. आध्या निकम हिने २ सुवर्णपदके पटकावली तर कु. आद्वी निकम हिने २ रौप्यपदके पटकावून खेडच्या शिरपेचात मानाचा तुरा रोवला आहे.
या राज्यस्तरीय स्केटिंग स्पर्धेमध्ये राज्यभरातील शाळांमधून अनेक खेळाडूंनी सहभाग नोंदविला होता. इतर जिल्ह्यातील सर्व खेळाडूंवर मात करत रोटरी स्कूलच्या या विद्यार्थिनींनी स्केटिंग खेळातील आपले कसब दाखवत २ सुवर्णपदके व २ रौप्यपदकांची कमाई केली. कु आध्या व कु. आद्वी यांना लहानपणापासून स्केटिंग खेळप्रकारात आवड आहे. यापूर्वी झालेल्या राज्यस्तरीय, जिल्हास्तरीय तसेच तालुकास्तरीय स्केटिंग स्पर्धांमध्ये या विद्यार्थिनींनी सुवर्ण तसेच रौप्य अशा पदकांची कमाई करून आपल्या नावाचा ठसा उमटविला आहे. विद्यार्थिनींच्या या दमदार कामगिरीमुळे प्रशालेमध्ये आनंदाचे वातावरण निर्माण झाले आहे.
संस्थेचे चेअरमन बिपीनदादा पाटणे, शाळेच्या मुख्याध्यापिका सौ. भूमिता पटेल, सर्व शिक्षक व शिक्षकेतर कर्मचारी यांनी कु. आध्या व कु. आद्वी यांचे कौतुक करून पुढील वाटचालीस शुभेच्छा दिल्या.
