(नवी दिल्ली)
भारत बनावट औषधांवर शून्य सहनशीलतेचे धोरण अवलंबत आहे आणि भारतात बनवलेल्या दूषित कफ सिरपमुळे होणाऱ्या मृत्यूंबाबत चिंता व्यक्त केल्यानंतर 71 कंपन्यांना कारणे दाखवा नोटीस बजावण्यात आली आहे आणि त्यापैकी 18 कंपन्या बंद करण्यास सांगितले आहे, असे केंद्रीय आरोग्य मंत्री मनसुख मांडविया यांनी म्हटले आहे.
पीटीआय या वृत्तसंस्थेला दिलेल्या विशेष मुलाखतीत केंद्रीय मंत्री म्हणाले, देशात दर्जेदार औषधांचे उत्पादन सुनिश्चित करण्यासाठी सर्वसमावेशक जोखमीवर आधारित विश्लेषण सातत्याने केले जात आहे. तसेच, बनावट औषधांमुळे कोणाचाही मृत्यू होऊ नये यासाठी सरकार आणि नियामक नेहमीच सतर्क असतात. ते म्हणाले की आम्ही जगाची फार्मसी आहोत आणि प्रत्येकाला खात्री देऊ इच्छितो की आम्ही जगातील ‘क्वालिटी फार्मसी’ आहोत.
या वर्षी फेब्रुवारीमध्ये, तामिळनाडूस्थित ग्लोबल फार्मा हेल्थकेअरने आपल्या डोळ्याच्या ड्रॉप्सची संपूर्ण खेप परत मागवली होती. गेल्या वर्षीच्या सुरुवातीला, गाम्बिया आणि उझबेकिस्तानमध्ये अनुक्रमे 66 आणि 18 मुलांचा मृत्यू भारतात बनवलेल्या कफ सिरपमुळे झाल्याचे सांगितले जात होते.
