(मुंबई)
बदलत्या जमान्यानुसार महिला प्रत्येक क्षेत्रात पुढे जात आहेत. प्रगतीच्या शिखरावर पोहचताना देशात महिला अब्जाधीशांची संख्या झपाट्याने वाढत आहे. सावित्री जिंदाल, फाल्गुनी नायर यांसारख्या अनेक महिला उद्योगपतींनी व्यावसायिक जगतात वेगळे स्थान प्राप्त केले आहे. यामुळे जगातील सर्वात श्रीमंत महिलांच्या बाबतीत भारत पाचव्या स्थानावर आहे. सिटी इंडेक्सने केलेल्या अभ्यासात महिला अब्जाधीशांच्या बाबतीत भारत जगात पाचव्या क्रमांकावर असल्याचा दावा करण्यात आला आहे. जाणून घेऊया कोणत्या देशात सर्वाधिक महिला अब्जाधीश आहेत.
या देशात सर्वाधिक महिला अब्जाधीश
सिटी इंडेक्सच्या अहवालातील महिला अब्जाधीशांच्या बाबतीत अमेरिकेने सर्व देशांना मागे टाकत अव्वल स्थान पटकावले आहे. अमेरिकेत सर्वाधिक अब्जाधीश महिला आहेत. अमेरिकेत एकूण 92 अब्जाधीश महिला आहेत. त्याचबरोबर या यादीत चीनचे नाव दुसऱ्या क्रमांकावर आहे. चीनमध्ये महिला अब्जाधीशांची संख्या 42 आहे. या यादीत जर्मनी तिसऱ्या क्रमांकावर आहे. येथे एकूण 32 अब्जाधीश महिला आहेत. या यादीत इटली चौथ्या स्थानावर आहे. या देशात महिला अब्जाधीशांची एकूण संख्या 16 आहे.
भारत पाचव्या स्थानावर
महिला अब्जाधीशांच्या बाबतीत ऑस्ट्रेलिया आणि हाँगकाँगसह भारत पाचव्या स्थानावर आहे. या सर्व देशांमध्ये महिला अब्जाधीशांची संख्या 9 आहे. जगातील 5 पैकी 4 श्रीमंत महिला अमेरिकेतील आहेत. L’Oreal च्या फ्रेंकोइस बेटेनकोर्ट मेयर्स 81.49 अब्ज डॉलर्सच्या संपत्तीसह जगातील सर्वात श्रीमंत महिला आहेत. त्याच वेळी वॉलमार्टची एलिस वॉल्टन 60.16 अब्ज डाॅलर संपत्तीसह दुसऱ्या क्रमांकावर आहेत.
भारतातील सर्वात श्रीमंत महिला
भारतातील अब्जाधीश महिलांबद्दल बोलायचे झाले तर जिंदाल ग्रुपच्या मालक आणि राजकारणी सावित्री जिंदाल या यादीत पहिल्या क्रमांकावर आहेत. सावित्री जिंदाल आणि त्यांच्या कुटुंबाची एकूण संपत्ती 16.96 अब्ज डॉलर्स (14 हजार कोटी) पेक्षा जास्त आहे.
विनोद राय गुप्ता
विनोद राय गुप्ता या भारतातील दुसऱ्या क्रमांकाच्या श्रीमंत महिला आहेत. हॅवेल्स इंडियाचे व्यवस्थापकीय संचालक अनिल गुप्ता यांच्या त्या आई आहेत. त्यांची एकूण संपत्ती 6.3 अब्ज डॉलर्स आहे.
रेखा झुनझुनवाला
गुंतवणूकदार राकेश झुनझुनवाला यांची पत्नी रेखा झुनझुनवाला या भारतातील तिसऱ्या सर्वात श्रीमंत महिला आहेत. त्यांची एकूण संपत्ती 5.9अब्ज डॉलर्स आहे.
फाल्गुनी नायर
न्यायकाच्या सीईओ फाल्गुनी नायर यांचेही नाव भारतातील सर्वात श्रीमंत व्यक्तींच्या यादीत समाविष्ट आहे. त्यांची एकूण संपत्ती 4.08 अब्ज डॉलर्स आहे.
लीना तिवारी
फार्मा आणि बायोटेक कंपनी USV Pvt Ltd च्या मालक लीना तिवारी या भारतातील पाचव्या क्रमांकाच्या श्रीमंत महिला आहेत.
दिव्या गोकुळनाथ
दिव्या गोकुलनाथ यांचे नाव भारतातील दिग्गज टेक उद्योगपतींच्या यादीत समाविष्ट आहे. त्यांनी 2011 मध्ये BYJU कंपनीची स्थापना केली. त्याची एकूण संपत्ती सध्या 3.6 अब्ज डाॅलर आहे.
मल्लिका श्रीनिवासन
मल्लिका श्रीनिवासन या ट्रॅक्टर आणि फार्म इक्विपमेंट लिमिटेडच्या सीईओ आहेत. त्यांची एकूण संपत्ती 3.4 अब्ज डॉलर आहे.
किरण मुझुमदार-शॉ
बायोकॉन लिमिटेड आणि बायोकॉन बायोलॉजिक्स लिमिटेडचे संस्थापक किरण मुझुमदार-शॉ यांची एकूण संपत्ती 2.7 अब्ज डाॅलरआहे. भारतातील श्रीमंत महिलांच्या यादीत त्यांचे स्थान आठवे आहे.
अनु आगा
1996 मध्ये थर्मॅक्स कंपनीची स्थापना करणाऱ्या अनु आगा यांची एकूण संपत्ती 2.8 अब्ज डॉलर आहे.
तर या यादीत लीना तिवारी, फाल्गुनी नायर, स्मिता कृष्णा शाह गोदरेज, अनु आगा आणि किरण मुझुमदार-शॉ या महिला अब्जाधीशांच्या नावाचाही समावेश आहे.
