(मुंबई)
राष्ट्रवादी पक्षाच्या २४ व्या वर्धापन दिनानिमित्त आयोजित कार्यक्रमात सुप्रिया सुळेआणि प्रफुल्ल पटेल यांना कार्यकारी अध्यक्षपदावर नेमल्यानंतर शरद पवार यांनी पक्षात आणखी एक मोठा फेरबदल केला आहे. रायगडचे खासदार सुनिल तटकरे यांना राष्ट्रवादीच्या राष्ट्रीय खजिनदार पदाची जबाबदारी देण्यात आली आहे. राष्ट्रीय खजिनदार पदासोबत सुनिल तटकरे यांना राष्ट्रीय सरचिटणीस पदाचीही जबाबदारी सोपवण्यात आली आहे. त्यासोबतच जितेंद्र आव्हाडांनाही राष्ट्रीय पातळीवर विविध राज्यांचे प्रभारीपद सोपवले.
राष्ट्रवादी काँग्रेस पक्षाचे राष्ट्रीय अध्यक्ष आदरणीय शरद पवार साहेब यांच्या मान्यतेने माननीय खा. सुनील तटकरे यांची पक्षाच्या राष्ट्रीय कोषाध्यक्षपदी नियुक्ती करण्यात आली आहे.@SunilTatkare pic.twitter.com/TUp07BPLAi
— Nationalist Congress Party – Sharadchandra Pawar (@NCPspeaks) June 12, 2023
गेल्या काही दिवसांपासून राष्ट्रवादीमध्ये भाकरी फिरवण्याचे संकेत शरद पवार देत होते. त्यातच त्यांनी अध्यपदावरून निवृत्तीचा निर्णय घेऊन राजकारणात खळबळ उडवून दिली होती. १० जून रोजी राष्ट्रवादीचा २४ वा वर्धापन दिन राज्यासह देशभरात साजरा करण्यात आला. याचवेळी राष्ट्रीय अध्यक्ष शरद पवार यांनी पक्षाच्या कार्याध्यक्ष पदी खासदार प्रफुल पटेल आणि खासदार सुप्रिया सुळे यांच्या नावाची घोषणा केली. शिवाय पक्षाचे ज्येष्ठ नेते आणि रायगड लोकसभा मतदारसंघाचे खासदार सुनिल तटकरे यांची राष्ट्रीय खजिनदार पदी नियुक्ती जाहीर केली आहे. तसे नियुक्तीपत्र खासदार सुनिल तटकरे यांना देण्यात आले आहे. तसेच याबाबतचे प्रसिद्धी पत्रक जारी करून ही माहिती देण्यात आली आहे.
