कोकणवासीयांना खुशखबर! नागपूर-मडगाव एक्सप्रेसला आता शेगाव स्थानकावरही थांबा

मडगाव – नागपूर एक्सप्रेस (०११३९ ) आणि नागपूर-मडगाव एक्सप्रेस (०११४० ) ही गाडी चार जानेवारी पासून शेगाव येथे थांबणार आहे.  बुधवारी दुपारी तीन वाजून पाच मिनिटांनी नागपूर येथून सुटणारी ही गाडी साधारण साडेसात वाजता शेगाव रेल्वे स्टेशनवर काल पहिल्यांदाच थांबली.  कोकण भागातील भक्तांना शेगाव येथे जाण्यासाठी ही गाडी अत्यंत सोयीची ठरणार आहे. मडगाव येथून रात्री आठ वाजता सुटणारी गाडी सकाळी सात वाजता पनवेल येथे पोहोचणार आहे.  सकाळी 7.05 वाजता पनवेल स्थानक येथून प्रस्थान करणारी गाडी दुपारी साडेतीन वाजता शेगाव येथे पोहोचेल. ही गाडी आठवड्यातून दोन दिवस चालविण्यात येते. प्रत्येक आठवड्यातील बुधवारी आणि शुक्रवारी ही गाडी नागपूर येथून सुटेल तर प्रत्येक गुरुवारी आणि रविवारी ही गाडी मडगाव येथून सुटेल.

या एक्सप्रेस गाडीचे शेगावसाठी ऑनलाइन आणि ऑफलाइन आरक्षण देखील सुरू झाले आहे. गजानन महाराज यांच्या संजीवन समाधीचे दर्शन घेण्यासाठी राज्यभरातून भाविक  बुलढाणा जिल्ह्यातील शेगाव येथे येत असतात. मात्र कोकणातील भक्तांसाठी थेट गाडी नसल्याने त्यांना पुणे, ठाणे व मुंबईहून गाडी पकडावी लागत होती. या एक्सप्रेसमुळे त्यांना मोठा दिलासा मिळाला आहे. विदर्भ आणि कोकण यांना जोडण्यासाठी अत्यंत महत्त्वाची समजली जाणारी मडगाव नागपूर एक्सप्रेस शेगाव या ठिकाणी थांबली पाहिजे या स्वरूपाची मागणी पनवेल प्रवासी संघाने लावून धरली होती.