( मुंबई )
एक सप्टेंबरपासून आर्थिक बाबींच्या संदर्भातील अनेक नियम बदलणार आहेत. या नियमांचा थेट परिणाम तुमच्या खिशावर होणार आहे. सप्टेंबर महिना हा काही कामे पूर्ण करण्यासाठीची डेडलाईन सुद्धा ठरवण्यात आली आहे. जाणून घ्या एक सप्टेंबरपासून कोणते नियम बदलणार आहेत.
LPG सिलेंडरचे दर
प्रत्येक महिन्याच्या पहिल्या तारखेला देशातील तेल कंपन्या एलपीजी सिलेंडरच्या दरांचा आढावा घेतात आणि नवीन दर जाहीर करतात. हा आढावा घेतल्यावर सिलेंडरच्या दरात कपात किंवा वाढ होऊ शकते. तसेच दर जैसे थे सुद्धा ठेवले जाऊ शकतात.
2000 रुपयांच्या नोटा बदलण्याची शेवटची संधी
आरबीआयने 2000 रुपयांच्या नोटा बँकेत जमा करण्यासाठी किंवा बदलून घेण्यासाठी चार महिन्यांची मुदत दिली होती. ही मुदत 30 सप्टेंबर 2023 पर्यंत आहे. त्यामुळे या तारखेपर्यंत तुमच्याकडे असलेल्या 2000 रुपयांच्या नोटा तुम्ही बदलून घेऊ शकता किंवा बँकेत जमा करु शकता.
क्रेडिट कार्डच्या संदर्भातील नियम
1 सप्टेंबर 2023 पासून Axis बँकेच्या मॅग्नस क्रेडिट कार्ड युजर्ससाठी महत्त्वाची आहे. एक सप्टेंबरपासून काही अटी आणि नियम बदलणार आहेत. बँकेने आपल्या वेबसाईटवर दिलेल्या माहितीनुसार, काही व्यवहारांवर एक सप्टेंबरपासून डिस्काऊंट मिळणार नाहीये. यासोबतच इतरही काही बदल होऊ शकतात.
बँकांना सुट्टी
सप्टेंबर महिन्यात अनेक सण-उत्सव असल्याने बँकांना सुट्टी असणार आहे. त्यामुळे तुमची महत्त्वाची कामे असतील तर बँकांच्या सुट्ट्या पाहून योग्य ते नियोजन करा आणि आपली कामे पूर्ण करा. सप्टेंबर महिन्यात असलेले सण-उत्सव आणि त्यासोबतच दुसरा, चौथा शनिवार तसेच रविवार यामुळे बँका अनेक दिवस बंद असतील.
आधार अपडेट फ्री करण्याची संधी
तुम्हाला आपलं आधार कार्ड मोफत अपडेट करायचं असेल तर 14 सप्टेंबर 2023 पर्यंत वेळ आहे. UIDAI ने आधार अपडेट करण्याची सुविधा मोफत उपलब्ध करुन दिली आहे आणि त्यासाठीची मुदत 14 सप्टेंबरपर्यंत आहे. यापूर्वी ही सुविधा 14 जूनपर्यंत होती त्यानंतर ही सुविधा 14 सप्टेंबरपर्यंत वाढवली आहे.
डीमॅट अकाऊंट नॉमिनेशन
तुमचे डीमॅट अकाऊंट असेल आणि त्यामध्ये तुम्ही नॉमिनेशन केलं नसेल तर या महिन्यात नक्की करुन घ्या. कारण, नॉमिनेशन नसलेले डीमॅट अकाऊंट हे सेबीकडून बंद केले जाऊ शकते. नॉमिनेशन करुन घेण्याची शेवटची तारीख 30 सप्टेंबर 2023 आहे.
