( रत्नागिरी / प्रतिनिधी)
शाहुवाडी कर्नाटक जयगडकडे साखर घेऊन जाणारा ट्रक आंबा घाटातील चक्री वळणावर दरीत कोसळून भीषण अपघात झाला. या अपघातात ट्रकचालक राणा ईरा चावडा (६२, रा. पोरबंदर, गुजरात) हे जखमी झाले. या अपघाताची नोंद साखरपा पोलिसात झाली आहे. ही घटना 6 फेब्रुवारी रोजी दुपारी 3 वाजण्याच्या सुमारास घडली. या अपघातात सुमारे वीस लाख रुपयांचे नुकसान झाल्याची चर्चा आहे.
राणा चावडा हे कर्नाटकहून जयगडकडे साखर घेऊन जात होते. चक्रीवळणावर गाडीवरील ताबा सुटल्याने ट्रक संरक्षण का तोडून थेट दरीत सव्वाशे फूट खोल कोसळला. दरीच्या मार्गावर झाडे असल्याने ट्रक सावकाश कोसळला. यामध्ये राणा केबीनमध्ये अडकले. त्यांच्या डाव्या पायाची टाच तुटली. येथील अमर पारळे व सोबत दोन मित्रांनी चालकास तातडीने केबीनमधून काढून आंबा प्राथमिक आरोग्य केंद्रात दाखल केले. तेथून त्यांना १०८ च्या सेवेने कोल्हापूर सीपीआरमध्ये दाखल केले. तपास पी.आय. प्रदीप पोवार, हेड कॉ. सागर उगळे, प्रताप वाकरे, पोलीस तुषार आम्बरे करीत आहेत.
