( पुणे )
पुण्यातील स्वारगेट एसटी स्टँड परिसरात उभ्या असलेल्या शिवशाही बसमध्ये २६ वर्षीय तरुणीवर अत्याचार झाल्याची धक्कादायक घटना घडली आहे. अंधाराचा फायदा घेत नराधमाने महिलेवर अत्याचार केला अन् पळ काढला. दत्तात्रय गाडे असे आरोपीचे नाव असल्याही माहिती आहे. या घटनेमुळे परिसरामध्ये एकच खळबळ उडाली असून पोलिसांकडून आरोपीचा शोध घेण्यात येत आहे.
मिळालेल्या माहितीनुसार, स्वारगेट बस डेपोत उभ्या असलेल्या शिवशाही बसमध्ये पीडित तरुणीला ओढून नेले आणि तिथे तिच्यावर अत्याचार करण्यात आले. ही सर्व घटना मंगळवारी रात्री घडल्याचे समोर आले आहे. याबाबत पोलिस स्टेशनमध्ये तक्रार दाखल करण्यात आली आहे. या घटनेमुळे पुणे पोलिसांच्या कार्यशैलीवर पुन्हा एकदा प्रश्नचिन्ह उपस्थित करण्यात येत आहे.
मिळालेल्या माहितीनुसार, पिडीत तरुणी पुण्यातून फलटणच्या दिशेने प्रवास करत होती. स्वारगेट एसटी स्टँड येथे थांबल्यानंतर एका अनोळखी व्यक्तीने तिची बस दुसऱ्या ठिकाणी थांबली असल्याचे सांगितले. मात्र, तरुणीने त्याच्यावर विश्वास ठेवला नाही. स्वारगेट बस स्थानकात ही तरुणी जिथे बसलेली होती, तिथे तिच्या बाजुला आणखी एक व्यक्ती होती. तेवढ्यात सदर आरोपी तिथे आला आणि तरुणीशी बोलू लागला. त्यावेळी ती अगोदर तिथे बसलेली व्यक्त निघून गेली. त्यानंतर आरोपीने तरुणीला बोलण्यात गुंतवलं, तिच्याशी गोड-गोड बोलून ओळख काढली आणि कुठे जाते ताई? असं विचारलं. त्यानंतर तरुणीने फलटणला जायचं असल्य़ाचं सांगितल. त्यावर तो म्हणाला की सातारची बस तिकडेच लागते. त्यावर तरुणी म्हणाली की सातारची बस इथेच लागते, त्यावर तो म्हणाला की बस दुसरीकडे लागली आणि मी तुला घेऊन जातो. त्यामुळे तरुणीही त्याच्यामागे गेली.
यादरम्यान आरोपीने तिच्या एकटेपणाचा फायदा घेत तिला विश्वासात घेतले आणि जवळ उभ्या असलेल्या एका बंद शिवशाही बसकडे घेऊन गेला. बस बंद असल्याचे लक्षात आल्यानंतरही आरोपीने तिला आत जाण्यास सांगितले आणि स्वतःही बसमध्ये घुसला. त्यानंतर त्याने तिच्यावर जबरदस्ती केली आणि लगेचच तिथून फरार झाला.
पोलिसांनी अज्ञात आरोपीविरोधात अत्याचाराचा गुन्हा दाखल केला असून वेगवेगळ्या पथकांमार्फत शोधमोहीम सुरू केली आहे. स्वारगेट बस स्थानक परिसरातील सीसीटीव्ही फुटेजच्या आधारे आरोपीची ओळख पटली असून लवकरच त्याला अटक करण्यात येईल, असा दावा पोलिसांनी केला आहे. अशा घटना समोर आल्यानंतर एसटी स्थानक परिसरातील सुरक्षेवर मोठे प्रश्नचिन्ह निर्माण झाले आहे. महिलांच्या सुरक्षेसाठी ठोस उपाययोजना करण्याची गरज अधोरेखित झाली आहे.
तर दुसरीकडे याच आगारात बंद स्थितीत असलेल्या शिवशाही बसमध्ये नेमकं काय चालतं, असा प्रश्न निर्माण झाला आहे. आगारात बंद असलेल्या अनेक शिवशाही बसेस उभ्या आहेत. या बसमध्ये ब्लँकेट्स, शर्ट, साड्या, अंतर्वस्त्रं आढळली आहेत. याच बसमध्ये वापरलेले कंडोम, त्यांची पाकिटंही सापडली आहेत. त्यामुळे बंद असलेल्या शिवशाही बसेसमध्ये नेमके काय प्रकार चालतात, असा प्रश्न निर्माण झाला आहे.
