( संगमेश्वर )
तालुक्यात गणेशोत्सवाला उत्साहात प्रारंभ झाला असून भाविकांनी सोमवारपासूनच गणेशमूर्ती वाजतगाजत मिरवणुकीने नेणे पसंद केले. देवरूख पोलिस ठाण्याच्या हद्दीत घरगुती ३७९२ व ७ सार्वजनिक गणपतींची नोंद आहे. संगमेश्वर पोलिस ठाण्याच्या हद्दीत ३४४१ घरगुती व १ सार्वजनिक गणेशोत्सवाची नोंद आहे.
देवरूख पोलिसांचा २१ दिवस चालणार्‍या गणेशोत्सवातील देवरुखच्या राजाचे सोमवारीच संध्याकाळी मिरवणुकीने आगमन झाले. मधली आळीतील श्रीदेव विठ्ठल मंदिरातील सार्वजनिक गणेशोत्सवातील गणेशमूर्तीचे मिरवणुकीने आगमन झाले. तसेच संगमेश्वरमधील भंडारवाड्यातील प्रतिष्ठित नागरिक समीर संतोष बोले यांच्या घरगुती गणपतीचे मिरवणुकीने ढोल ताशांच्या गजरात आगमन झाले. देवरुखमधील गणेशमूर्ती चित्रशाळेत सायंकाळी गर्दी झाली होती. देवरूख, संगमेश्वर या दोन्ही बाजारपेठेतही रविवारपासून गर्दी आहे.
देवरूख व संगमेश्वर पोलिसांनी चोख बंदोबस्त ठेवला आहे. पोलिस व्हॅनमधून गर्दीच्या ठिकाणी भाविकांना सुरक्षेच्या सूचना देण्यात येत आहेत. मंगळवारी (ता. १९) गणेशचर्तुर्थीला गणरायांची घरोघरी प्राणप्रतिष्ठापना होणार असून दुपारी व रात्री आरत्यांचे सूर घुमणार आहेत.
