“गो-कार्ट” रेसिंगवेळी ओढणी अडकून मुंबईच्या महिलेचा महाबळेश्वरमध्ये दुर्दैवी मृत्यू

(सातारा)

महाबळेश्वरमध्ये वेण्णालेक परिसरात गो-कार्ट रेसिंग करणे एका महिलेच्या जीवावर बेतले आहे. गो-कार्टिंग ट्रॅकवर बुक कटिंग करताना वाहनाच्या चाकात ओढणी अडकून गळफास लागल्यामुळं या महिलेला आपला जीव गमवावा लागला आहे. सना अमीर पेटीवाला (वय 24, रा. मिरारोड, मुंबई) असे मृत पावलेल्या महिलेचे नाव आहे.

मिरा रोड येथील सना अमीर पेटीवाला ही महिला पर्यटनासाठी महाबळेश्वर गेली होती. यावेळी सना यांची गो-कार्टिंग ट्रॅकवर बुक कटिंग ही साहसी भरधाव छोटी गाडी चालवण्याची इच्छा झाली. परंतु ही गाडी चालवताना त्यांची ओढणी गाडीच्या चाकात अडकल्याने सना गंभीर जखमी झाल्या. त्यानंतर त्यांना स्थानिकांच्या मदतीने महाबळेश्वर ग्रामीण रुग्णालयात उपचारासाठी दाखल करण्यात आले. मात्र त्यापूर्वीच त्यांचा मृत्यू झाला होता. या प्रकरणाचा अधिक तपास पोलीस करीत आहेत.