(मुंबई)
अभिनेत्री राखी सावंत नेहमीच कोणत्या ना कोणत्या गोष्टींमुळे चर्चेत अथवा वादात असते. राखी सतत आपल्या हटके अंदाजाने प्रेक्षकांचे मनोरंजन करत असते. सोबतच राखी आपल्या खाजगी आयुष्यामुळेदेखील चर्चेत येते. नुकताच मराठी बिग बाॅस सिझन चार मध्ये राखी दिसली होती. बॉलिवूडची ड्रामा क्वीन म्हणून ओळखली जाणारी अभिनेत्री राखी सावंत ने मराठी बिग बाॅस देखील चांगलंच गाजवले होते.
नुकताच बिग बाॅस मराठी सिझन संपला आहे. मात्र त्यानंतर लगेच राखीने तिच्या चाहत्यांना एक धक्का दिला आहे. राखीने तिचा बाॅयफ्रेड आदिल सोबत कोर्ट मॅरेज केलं आहे. दोघांनीही गुपचूप लग्न केलं असल्याचे समोर येत आहे. राखी सावंतचे लग्नाचे फोटो सध्या सोशल मीडियावर व्हायरल होत आहेत. यामध्ये आदिल आणि राखी गळ्यात वरमाला घालून फोटोसाठी पोज देताना दिसून येत आहेत. त्यांच्या हातामध्ये मॅरिज सर्टिफिकेट दिसून येत आहे. यावरुन दोघांनी कोर्ट मॅरेज केल्याचा अंदाज बांधला जात आहे.
राखी गेल्या अनेक दिवसांपासून दुबई स्थित उद्योगपती आदिल दुरानीला डेट करत आहे. या दोघांनी स्वतः माध्यमांना आपल्या नात्याबाबत सांगितलं होतं. तसेच राखी आणि आदिल सतत जीममध्ये आणि एयरपोर्टवर एकत्र दिसून येत होते. राखी आणि आदिल लग्न कधी करणार याची त्यांच्या चाहत्यांना अनेक दिवसांपासून उत्सुकता होती. दरम्यान आता राखी सावंत आणि आदिल दुरानीने गुपचूप लग्न उरकल्याचं समोर येत आहे. मात्र राखी किंवा आदिलने याबाबत कोणतीही अधिकृत घोषणा केलेली नाही.
