[ संगमेश्वर /प्रतिनिधी ]
गणपती बाप्पा मोरया, पुढल्या वर्षी लवकर या अशी प्रार्थना करीत ढोल-ताशे वाजंत्रीची मिरवणूक, गुलालांची उधळण करीत संगमेश्वर शहर परिसरातील गणेशमूर्तीचे सोमवारी सायंकाळी उत्साहात विसर्जन करण्यात आले.
संगमेश्वर तालुक्यातील सुमारे १७४७८ गणपती-गौरीचे विसर्जन करण्यात आले. तालुक्यात आठ सार्वजनिक, २६०३७ घरगुती गणपतींचे गणेश चतुर्थीला आगमन झाले. दीड दिवसांच्या एक सार्वजनिक, १००६ गणपतींना भावपूर्ण निरोप देण्यात आला. सोमवारी सायंकाळी तालुक्यातील गणपतींचे गौरीसह विसर्जन करण्यात आले. देवरुख पोलीस स्थानकाच्या हद्दीतील ८२९५, संगमेश्वर पोलीस स्थानकाच्या हद्दीतील ९१८३ गणेशमूर्तीचे अतिशय शांततेत, उत्साही वातावरणात विसर्जन करण्यात आले. विघ्नहर्त्या गणरायाच्या आगमनाप्रमाणेच विसर्जन मिरवणुकीला पावसाचा कोणताही अडथळा निर्माण झालेला नाही.
सप्तलिंगी, शास्त्री आणि सोणवी या नद्यांवर अनेक ठिकाणी विसर्जनाची सुविधा करण्यात आली होती. शहरासह अन्य ठिकाणी गणेशमूर्तीच्या विसर्जनासाठी भाविकांनी गर्दी केली होती. यावेळी संगमेश्वर पोलीस, होमगार्ड यांच्या वतीने विसर्जनाच्या ठिकाणी चोख बंदोबस्त ठेवण्यात आला होता. सायंकाळी उशिरापर्यंत गणेशमूर्तीचा विसर्जन सोहळा सुरू होता.
