(प्रतिनिधी / लांजा )
मुंबई-गोवा महामार्गावर वाकेड बोरथडे फाटा येथे आज गुरुवारी दुपारी १२.३० वाजण्याच्या सुमारास कंटेनर आणि आयशरची समोरासमोर धडक बसून दोन जण जखमी झाले आहेत. या अपघातामुळे महामार्गावरील वाहतूक काहीकाळ विस्कळीत झाली होती. रामचंद्र बाब्या होडे, बाबुलाल भगवान सांगले (अधिक माहिती समजू शकलेली नाही) अशी जखमी चालकांची नावे आहेत.
कंटेनर चालक बाबुलाल भगवान सांगले हा आपल्या ताब्यातील कंटेनर घेऊन गोव्याच्या दिशेने निघाला होता. तर रामचंद्र बाब्या होडे हा आपल्या ताब्यातील आयशर घेउन गोवा ते मुंबई असा जात होता. गुरुवारी दुपारी १२.३० वाजण्याच्या दरम्यान दोन्हीही वाहने महामार्गावरील वाकेड बोरथडे फाटा येथे आली असता दोघांमध्ये समोरासमोर धडक झाली. या धडकेत दोन्ही वाहनांचे मोठ्या प्रमाणात नुकसान झाले. तर चालक जखमी झाले आहेत. महामार्गाच्या मध्यभागीच अपघात झाल्याने अर्धातास महामार्गावरील वाहतूक ठप्प होती. त्यानंतर वाहने बाजूला केल्यानंतर वाहतुक सुरळीत झाली.
