(लांजा)
लांजा शहरातील विद्यादीप एज्युकेशन संस्था मुंबई, संचलित विद्यादीप जुनियर कॉलेज येथे दि. 25 मार्च रोजी इयत्ता बारावी मागील चार वर्षांच्या विद्यार्थ्यांचे गेट-टुगेदर चे आयोजन करण्यात आले होते. या सोहळ्याला मागील चार वर्षाच्या विद्यार्थ्यांनी उपस्थिती लावली.
या कार्यक्रमात विद्यार्थ्यांनी दिलखुलास एकमेकांशी संवाद साधला. जुन्या आठवणींना आपल्या मनोगतातून उजाळा दिला. कॉलेजमध्ये परत येऊन बसावे अशी इच्छा असल्याचे सांगत सध्या या कॉलेजमध्ये शिकत असलेल्या विद्यार्थ्यांच्या सर्वांगिण विकासासाठी माजी विद्यार्थी संघटना स्थापन व्हावी असा मानस बहुसंख्य विद्यार्थ्यांनी बोलून दाखविला.
या कार्यक्रमात लांजा तालुक्यातील खावडी हायस्कूलचे मुख्याध्यापक संस्कृती फाउंडेशन राज्यस्तरीय आदर्श शिक्षक पुरस्काराने सन्मानित श्री देसाई सर यांचा सत्कार श्री. लाखणसर, श्री. राजेशिर्के यांच्या हस्ते करण्यात आला.
या कार्यक्रमाला लांजा शहराचे राष्ट्रवादी काँग्रेसचे प्रभारी अध्यक्ष श्री अभिजित राजेशिर्के उपस्थित होते. त्यांनी विद्यार्थ्यांना शुभेच्छा देत तरुणांनी अशा प्रकारे एकत्र यायला हवे, तरच आपला देश नवीन संकल्पनाच्या दिशेने वाटचाल करेल, असे विचार आपल्या मनोगतातून व्यक्त केले. तसेच या कार्यक्रमाला तालुक्यातील हायस्कूलचे मुख्याध्यापक व शिक्षकही उपस्थित होते. त्याच बरोबर पालक वर्ग, या संस्थेचे चेअरमन लाखणसर हे सुद्धा या कार्यक्रमाला उपस्थित होते. या सोहळ्याप्रसंगी कॉलेज चे प्राचार्य श्री अमोल जाधव सर यांनी आपल्या मनोगतातून सर्व विद्यार्थ्यांना यथोचित ध्येय गाठण्यासाठी शुभेच्छा दिल्या आणि सर्व उपस्थितांचे आभार मानले.
या कार्यक्रमाचे पूर्ण नियोजन प्रा. मनाली पांचाळ यांनी केले तर सूत्रसंचालन प्रा. मधुश्री पाध्ये यांनी केले. तर उपस्थितांचे आभार प्रा. किरण चव्हाण यांनी मानले.
